воскресенье, 27 декабря 2020 г.

Илля Вась юбилейӧн!

 Талун тырӧ 125 во Илля Вась чужӧмсянь. Пасйышта, кыдзи сылӧн гижӧдъясӧн тӧдмаси.

Медвойдӧр менам вӧлі лыддьӧма "Кань" кывбур, Цыпанов Йӧлгинь учебникысь. (Казьтыла, кыдзи виччыси: кор нӧ 14-ӧд урокӧдз воа да верма нин гӧгӧрвоны, мый сэні гижӧма?)

Сэсся Коми онлайн небӧгаинӧ пуктӧмаӧсь Илля Васьлысь гижӧдъяс да контактын мыйсюрӧ вӧлі йӧзӧдӧма: "Шыпича" легенда, "Гажӧдчӧм" кывбур — и сэки ме аддзи, кутшӧм сійӧ енбиа поэт. Сэсся нин понді "Сёрни-басни" котырӧ сылысь гижӧдъяс пуктавны (кывбуръяс да дзоляяслы мойдъяс), "Мунӧны" поэма лыдди. Буретш Илля Вась комиӧдӧмъяс пыр медводзысь тӧдмаси удмурт поэзиякӧд (Кузебай Герд да Ашальчи Оки гижӧдъяскӧд).

Ёна сьӧлӧм вылӧ воис "Мый медся дона да муса" небӧг, кытчӧ пырӧмаӧсь Илля Вась статьяяс: 20-ӧд воясся публицистика, коми кыв да история туялана гижӧдъяс, литература туялӧм да критика, казьтылӧмъяс.

30-ӧд воясся гижӧдъясыс, буракӧ, абу паськыда тӧдсаӧсь. "Мунӧны" поэмасӧ пармазонъяс-оботуровъяс лёка критикуйтӧмаӧсь да, сы бӧрын, тыдалӧ, Илля Вась зільӧма гижны сійӧ кадся мода да нырвизь серти. Некымын сэтшӧм гижӧд пырӧмаӧсь "Выль шыяс" сборникӧ. (Колӧ шуны, Тима Вень сійӧ жӧ кадӧ пӧшти сэтшӧм жӧ стильӧн гижӧма.) Сэсся, кыдзи ми ставным тӧдам, Илля Васьӧс дзескыдінӧ пуксьӧдӧмаӧсь. Мездмӧм бӧрын, 1936–38' воясӧ, сійӧ, вӧлӧмкӧ, куим кывбур гижӧма. Йӧзӧдӧмаӧсь найӧс сӧмын 90-ӧд воын "Войвыв кодзув" журналын.

Гожӧмнас Е.А. Игушевлысь "Ас кывлӧн ловзьӧдан гор" небӧгсӧ лыдди. Вайӧда сэтысь кык цитата:


"...Меным тӧд вылӧ воис 1979-ӧд вося
„Куратов Иванлы сиӧм лыддьӧмъяс“ конференция, сэні кызвын сёрнитысьыс лыддис ассьыныс юӧртӧмнысӧ рочӧн... И сӧмын Илля Васьлӧн да менам юӧртӧмъяс юргисны комиӧн. Илля Вась ачыс весиг шенмуніс:

— Коми поэт йылысь сёрнитам, а коми кывйӧн вӧдитчысьыс кыкӧн и эмӧсь, быдсӧн рочӧн висьтасьӧны..."

"...Илля Вась... аслас енбиа велӧдчыськӧд Петыр Семӧ Йӧвгинькӧд (Е.С. Гуляев асьсӧ уджъёртъяс пӧвстас тадзи вӧлі шуӧ) дасьтӧма да лэдзӧма коми кыввор этимология дженьыд кывкуд. Татшӧм кывкудйыс зэв шоч фин-угор войтырыдлӧн. Сӧмын венгръяс да финъяс вермӧны ошйысьны татшӧмнад, а мукӧд рӧдвуж войтырлӧн 1970-ӧд воӧдзыс, кор петіс КЭСК-ыс, татшӧм кывкудйыс эз на вӧв. И некор Илля Васьыд эз пуксьыв мукӧдысь вылӧджык чужан кыв туялан уджас. Таысь сійӧс ёна пыдди пуктӧ быдӧн..."

Медым жӧ комияс, ӧнія сьӧкыдлунъяс вылӧ видзӧдтӧг, водзӧ кутасны лыддьыны Илля Васьлысь гижӧдъяссӧ!

суббота, 19 декабря 2020 г.

Сӧвет кадся челядьдыр (Зоя Черкасскаялӧн серпасъяс)

Неважӧн тӧдмалі енбиа серпасалысь Зоя Черкасская йылысь. Сійӧ чужлӧма 1976-ӧд воӧ Киевын, велӧдчӧма Тарас Шевченко нима художество школаын. 15 арӧсаӧн мунӧма Израильӧ, ӧні сэн и олӧ.

Зоя Черкасскаялӧн эм унакодь серпас сёр сӧвет кадся олӧм йылысь. Йӧзыслы тайӧ ловтӧ вӧрзьӧдана картинаясыс ёна сьӧлӧм вылӧ воӧны. (Сӧмын антикоммунистъяс да Сӧвет Союзсӧ идеализируйтысьяс лӧгалӧны: вывті пӧ мичаа либӧ, мӧдарӧ, мисьтӧма олӧмсӧ петкӧдлӧма). Серпасалысьыс пӧ ачыс коммунистъясӧс радейтӧ.

Содта татчӧ Зоя Черкасскаялысь некымын серпассӧ (ӧтуввезйысь найӧс кокньыд корсьны).

Со нывка тӧвся асывнас чеччӧ, школаӧ мунны дасьтысьӧ:

Физкультура залын кокша вомӧн велӧдчысьяс чеччалӧны:

Со лавкаысь пӧч локтіс (пӧшти менам пӧч кодь!):

Ми сідзи жӧ резинкаӧн чеччалім:



четверг, 19 ноября 2020 г.

Бара юр выв тыр удж да...

блогӧ гижны ог удит. Позис эськӧ нӧшта ӧти подстрочник "пӧжавны", но, ме чайта, вермас дышӧдны нин лыддьысьысьяслы. Колӧ нин тема вежны, мӧдтор йылысь висьтавны (гортын пукалігӧн кӧ интереснӧйтор либӧ тешкодьтор аддза). Сёрӧнджык, дерт, выльысь позяс коми йӧзӧс удмурт поэзиякӧд тӧдмӧдыштны кывйысь кывйӧ вуджӧдӧмӧн да коми гижысьясӧс чукӧстӧмӧн.

Ӧні ме став предмет онлайн нуӧда. Сідзкӧ, ковмас и функциональнӧй анализ семинаръяс кежлӧ презенташкаяс вӧчны (бара уна кад босьтас) да студентъяслысь гортса уджсӧ прӧверайтны. Бур кӧть вариационнӧй артасьӧм кузя лекцияяс регыд помасясны, водзджык удиті пӧшти став материал висьтавны да.

Иван Вавилинлысь "Сьӧлӧм сьылӧм" небӧгсӧ корсюрӧ лыддя да текст файл редактируйта. Дерт, зэв-зэв ньӧжмыда, но мыйсюрӧ верма нин шуны. Прав вӧлі Илля Вась: рифмаясыс Баярса Иванлӧн интереснӧйӧсь да мичаӧсь. Весиг "официозсӧ" лыддьыны абу гажтӧм.

пятница, 6 ноября 2020 г.

"Мон визьтэм вал азьло" кывбурлы подстрочник

Нӧшта ӧти подстрочник лӧсьӧда. Ӧні — Ашальчи Оки кывбурлы (юрнимыс вуджӧдсьӧ тадзи: "Ме йӧй вӧлі войдӧр"; оригиналсӧ позьӧ аддзыны татысь, лб. 22). Со сійӧ:

Ме йӧй, дзик йӧй вӧлі войдӧр: шонді дырйи посни зэр усигӧн, енэж шӧрӧ ӧшкамӧшка кайигӧн — "тайӧ мича ӧшкамӧшка кодь дӧрӧм кыны эськӧ верми" — мӧвпала вӧлі войдӧр... Войясын жӧ, вылӧ видзӧдӧмӧн, кодзув бияс аддзӧмӧн — "наысь сикӧтш вӧчны верми эськӧ" — мӧвпала вӧлі войдӧр... Лӧз кымӧр, шондіӧс сайӧдігӧн, эзысьӧн-зарниӧн быгӧртчӧ — "тайӧ дорсӧ босьті кӧ да чышъянӧс эськӧ быгӧртны верми" — мӧвпала вӧлі войдӧр... Ме и ӧні йӧй, дзик йӧй: тувсовъя ва шы кыла да ылӧдлан вӧтъяс вӧтася, ылӧдлан вӧтъяслы эска да — "збыль шудӧй кӧнкӧ водзын на" чайтігӧн аскиа лун виччыся...

понедельник, 26 октября 2020 г.

Кузебай Гердлӧн "Зарни кылбуръёс"-лы подстрочник

 Кузебай Гердлысь нӧшта ӧти кывбурсӧ лыдди (оригиналсӧ позьӧ аддзыны татысь, 88' лб.). Со подстрочникыс:

Эзысь кодзувъяс, мича кодзувъяс дзоридзьяслы висьталӧмаӧсь зарни кывбуръяс. "Садьмӧдӧй удмуртъясӧс узьӧмысь!"  шуӧмаӧсь, тӧв ньылыд ассьыныс сёрнинысӧ лэдзӧмаӧсь. Тӧв пондӧма ветлыны му югыд пасьта — вӧръясті, сьӧд пемыд сиктъясті: зарни кывъяссӧ йӧзлы висьталӧмӧн, удмурт войтырӧс узьӧмысь садьмӧдӧмӧн. Ме узя, кулӧм моз узя вӧлі, ковмас олӧм чӧж узьны — чайта вӧлі;  зарни кывбуръяс ме дорӧ воисны, сьӧлӧмӧс найӧ узьӧмысь пальӧдісны. Узьӧмысь ме чеччи, синъясӧс нирті, ас гӧгӧр видзӧдны босьтчи — удмуртъяс узьӧны на сьӧд пемыд сиктъясын, узьӧны на сук сьӧд вӧръясын. Менам сьӧлӧмӧй биӧн сотӧм кодь лоис, удмуртъяс узьӧмысла ас пытшкӧ эг тӧр. Сувтӧй нин, мися, горза, садьмӧд коньӧръясӧс, мися, ёртӧйлы шуа!

понедельник, 19 октября 2020 г.

Тима Вень чужан лун кежлӧ (дженьыда)

Вой шӧр вой нин, но колӧ жӧ кыв-мӧд гижыштны Тима Вень чужан лун кежлӧ: сійӧ ӧд менам медся радейтана гижысьяс пӧвстын! Блогын ме сылӧн творчество йывсьыс некымынысь гаравлі нин: кыдзи тӧдмаси сылӧн поэзиякӧд, кыдзи "Трипан Васьӧс" лыдди, "важ мира йир" да "кӧза плен" йылысь висьталі... Литература тӧдысьяс, дерт, унатор нин гижӧмаӧсь Тима Веньлӧн лирика да ритма проза йылысь, сідзжӧ уна казьтылӧм эм. Та вӧсна ӧні ассянь нинӧм ог содты, бурджык вӧзъя туялысьясӧс лыддьыны. 

Шуам, "Коми енкӧлаӧ" пукті Алёна Ельцовалысь, Вера Латышевалысь [1, 2; водзӧ лоӧ на], Валерий Мартыновлысь [1, 2; водзӧ лоӧ на], Исай Нестеровлысь "Миянӧс велӧдліс Тима Вень" статьяяссӧ, дасьтігӧн лыдди найӧс. Сідзжӧ лыдди Тима Веньлысь "Ур йылысь" очерксӧ. Позьӧ шуны, сунгыси мича коми кывйӧ. Лолӧйлы сэтшӧм нимкодь лои!


воскресенье, 4 октября 2020 г.

Тшайко: пон али вӧв?

Тӧрыт "Сёрни-басни" котырӧ йирым пом кежлӧ гижӧдъяс дасьті. Кӧсйи пуктыны Петыр Саньӧлысь "Тшайко" кывбурсӧ да зіли лӧсяланаджык серпас бӧрйыны. Тӧді: понъяслы нимъяс тшӧкыда рӧм серти сеталӧны. Аддзи ӧтуввезйысь Е. А. Цыпановлысь пон нимъяс йылысь статьясӧ. "Тшайко" нимыс сюри, сӧмын рӧмыс абу пасйӧма.*

Гижи Ӧльӧксей Рассыхаевлы. Вочакывйыс вӧлі виччысьтӧм: Тшайко пӧ вӧв ним! Выльысь лыдди Петыр Саньӧлысь кывбурсӧ... вӧлӧмкӧ, сійӧ вермӧ лоны и пон йылысь, и вӧв йылысь, сӧмын небӧгӧ, лист бок улыс пельӧсас, серпасалӧма ичӧтик пон. Но, мися, понъя-вӧла серпасӧн да юасьӧмӧн "Тшайко"-сӧ Сёрни-басниӧ пукта, медым йӧзыс кипасаласны...

 


Неуна сёрӧнджык Микол Ӧльӧш меным ыстіс сёрнисикасъяс кывкудйысь скан: сы серти кӧ, Тшайкоыд сӧмын вӧв ним.



Видзӧдлі коми кыв корпусӧ. Со мый петӧма:

  • Геннадий Юшковлӧн ("Чугра" романын) Тшайко — пон ним; 
  • Виктор Напалковлӧн ("Эзысь перна", "Ме тэнӧ радейта", "Войся ангел") — вӧв ним; 
  • Алексей Поповлӧн ("Шань Олыся") — пон ним.
  • Петыр Саньӧлӧн ("Тшап Семӧ") — пон ним.

"Тшап Семӧ" кывбурын нин стӧча пасйӧма: Тшайко
— пон.

Сідзкӧ, "Тшайко" кывбурын пон йылысь жӧ сёрниыс ли мый ли?


*Талун, блогӧ гижӧд нин дасьтігӧн, нӧшта "Пон ним" лист бок аддзи; сэні гижӧма, Тшайко пон пӧ быттьӧкӧ еджыд чулкиа.

 

четверг, 1 октября 2020 г.

Помалі "Ордымъясӧн" ноксьыны

Содті Коми онлайн небӧгаинӧ 1926–1929-ӧд воясся "Ордым" журналъясысь гижӧдъяс (мый позьӧ копирайт боксянь). Локтан воясӧ верма нӧшта некымын авторлысь гижӧд содтыны (шуам, Ичӧт Иванлысь)кулӧмсяньныс 70 во тырас да. Но ӧні кежлӧ уджӧй эштӧдӧма. 

1930-ӧд воясся номеръяссӧ финн-йӧгра лаборатория абу на тексталӧма да, тшӧтш колӧ виччысьны.

Нӧшта жаль — перым коми орфография ог тӧд: "Ордымъясын" перым коми текстъяс паныдасьлісны жӧ, но эг вермы найӧс редактируйтны.

***

Медбӧръя содтӧм гижӧд — Тима Веньлӧн "Коми поэзия формаяс йылысь". Лыддям!


пятница, 25 сентября 2020 г.

Кузебай Гердлӧн "Шуд" кывбурлы подстрочник

 Нӧшта ӧти кывбурлы подстрочник лӧсьӧді. Ачым абу гижысь да, сӧмын тадзи вуджӧда. Гашкӧ, кодкӧ коркӧ и вӧчас мича кывбурӧн комиӧдӧм. 

Оригиналсӧ позьӧ аддзыны татысь, 82-ӧд лист бокысь.

Со кыдзи Кузебай Герд шуд йылысь гижӧ: 

«Тӧданныд-ӧ, удмуртъясӧй, коді нӧ ме, ті тӧданныд-ӧ? Морт, ыбкай, виж дзоридз, Кама дорса эжӧр? Енэжын дзирдалысь кодзув, шувгей, дой? Ва гы, мича вӧт, бобув, долыдлун? Ті дорӧ кӧ ме локта, воӧмӧс казяланныд онӧ? Серавны кӧ босьтча, гӧлӧсӧс кыланныд онӧ? Тувсов гы кышӧдчигӧн гӧлӧсӧс тӧдмаланныд онӧ? Тувсов му дзоридзалігӧн дзоридзьяс пӧвстысь аддзанныд онӧ? Ті онӧ аддзӧй, онӧ тӧдӧй менсьым оланінӧс, ті онӧ казялӧй некор и менсьым кок туйӧс. Шувгей ме, бобув ме — кӧть кытчӧ и вола, коньӧр, вынтӧммӧм йӧзлысь сьӧлӧмсӧ пальӧда! Шог вӧсна косьмиганыд, бурӧдӧм кыланныд онӧ? Нимкодя узиганыд ме вӧтӧн петкӧдчӧм тӧдмаланныд онӧ? Вой шӧр кадӧ кодзувъяс енэжысь аддзанныд онӧ? Кӧть кытчӧ мун, кӧть кӧні ме ветла шуанныд онӧ?»

четверг, 17 сентября 2020 г.

Дистанционнӧй лекцияяс кежлӧ дасьтыся

Тайӧ, вӧлӧмкӧ, гажтӧмкодь "механическӧй" удж. Вӧча презентацияяс да, колӧ гижӧм текст торъяс копируйтны, транслируйтны LaTeX программаӧн да видзӧдны, тӧрис эз текстыс слайдӧ, сэсся ладмӧдны да "паузаяс" пуктавны. Аудиторияын нуӧдан лекцияяс кежлӧ дасьтысьны ёна гажаджык вӧлі: план да медшӧр идеяяс тӧд вылӧ уськӧдан, математика мичлуннас нимкодясян... А ӧні 

    Ой, олӧмӧй, олӧмӧй,
    Вирусысь видзчысьӧмӧй,
    Гортын асйӧршитчӧмӧй,
    Презенташка вӧчӧмӧй...

Лекцияяс лыддигӧн тшӧтш жӧ "приччаяс" артмӧны (Нёбдінса Виттор ногӧн кӧ шуны). Ӧтчыд батарейкаын зарад бырис да студентъяскӧд "зумасигӧн" ноутбук менам виччысьтӧг кусі, "10% зарад коли" гижӧд эз петкӧдчы да. Выльысь ковмис ставсӧ ладмӧдны. Регыд ноутбук "чилзіс". Вӧлӧмкӧ, керкаын электричество кусі. Пробкаясӧ личкӧм эз отсав. Ковмис йӧрӧд ӧмидз кустъяс пыр суседка дорӧ котӧртны ноутӧн да запчасьтъяснас (дачаын на ола). Бур кӧть сійӧ лунӧ эз зэр... Вежон мысти лекция дырйи каньӧй сьӧлӧмсяньыс нявзіс да колис сылӧн горзӧмыс zoom-сессия видеогижӧдын. Йӧз серам!

Но, ме ог норась. Школаын велӧдысьяслы дзик нин сьӧкыд. Некод блогӧ бара эз гиж да, колӧ нӧ эськӧ мыйкӧ висьтавны. Видлалі талун "Коми блогйысь" котырсӧ, ыстӧгъяс лички да — бара "Пышйыны некытчӧ" да "Ставнас недоступно" аддза. Видзӧдлі, мый Арся квайт во сайын гижӧма — вӧлӧмкӧ, блогйысьясӧс ышӧдны зільӧма!

"Талун лои бара ыззьӧдыштны миян коми блогйысьясӧс. Кыкыс отпускасьӧны да, он и су. А карсаяс нӧ мый? Куим юыс оз визувтны. Нюрзисны ли мый первойсяньыс жӧ? Коми кывбуръяс вывті гежӧда юргыштӧны. А Тувсовъяыд оз кӧ тӧв пуксьытӧдз арся тӧждъяснас ноксьыны кӧсйы?.. Вӧрӧдышті куимнаннысӧ  ог тӧд, кодкӧ зільмас оз... Микол Ӧльӧшыд тай ас кежысь гижӧ-а. Некутшӧм торъя ышӧд оз ков."

Ме тай некодӧс босьтчӧдны ог куж...

вторник, 8 сентября 2020 г.

Ашальчи Окилӧн "Даур" кывбурлы подстрочник

 Кывбурыс вӧлі гижӧма 1919-ӧд воын. Буракӧ, сійӧ абу комиӧдӧма. Оригиналсӧ позьӧ аддзыны татысь (лб. 1314).

Со подстрочникыс. "Вӧлі кӧ позянлунӧй, ылӧ эськӧ муні — енкӧласӧ гӧгӧрті, ассьым шудсӧ аддзи. Куті да бергӧді ме эськӧ челядьдырся кадсӧ, шыбиті да вежи эськӧ тайӧ пӧрысь чужӧмбанӧс. Дзормӧм юрсиӧс бара эськӧ сьӧдӧн вӧчи, шогсьысь сьӧлӧмӧс ме эськӧ шудаӧн вӧчи. Ок, абу менам позянлун выльысь нывкаӧн лоны, ог ӧд куж кадсӧ вермыны. Тӧвнас дзоридзсӧ дзик он вермы судзӧдны, мунӧм кадсӧ он вермы бергӧдны."

суббота, 5 сентября 2020 г.

Арся медводдза вежон

Со и эштіс миян медводдза велӧдчан вежон. Моз тӧлысь 31-ӧд лунӧ вӧлі миян кафедра чукӧртчӧм. Расписанньӧ эз на вӧв, сӧмын рытнас ыстісны. Мехматса натшальство тшӧктӧма: 1–3 курсса студентъясӧс пӧ колӧ велӧдны аудиторияясын (гуманитарнӧй дисциплинаясысь кындзи), а 4-ӧд курссянь — кафедра шуӧм серти. Ми сёрнитчим: вариационнӧй арталӧм (4-ӧд курслы) да выпуклӧй анализ (5-ӧд курслы) велӧдам дистанция ногӧн, zoom пыр. Спецкурсъяс пӧ тшӧтш сӧветуйтӧны гортсянь велӧдны. Сідзкӧ, ковмас и университетӧ ветлавны, и презентацияяс вӧчавны, и ыстӧм гортса уджъяс прӧверайтны. Видзӧдлам, мый сэсся лоас...

Пукті коми онлайн небӧгаинӧ "Школаын лыддянтор" учебникысь гижӧдъяс. Заводиті дасьтыны "Важ олӧм вежсьӧ" кывбурсӧ (небӧгас пасйӧма: авторыс Нёбдінса Виттор), гуглиті да тыдовтчис: небӧгаинӧ сійӧ нин пуктӧма, а авторыс пӧ Сандрик Микол. Видзӧдлі коми тӧданінӧ: Нёбдінса Виттор нимӧн, вӧлӧмкӧ, кывбурыс петӧма "Лыддянтор"-ын да 1931-ӧд вося гижӧд чукӧрын. А Сандрик Микол нимӧн — 1994-ӧд воын дасьтӧм небӧгын, кӧні пасйӧма: печатайтӧма пӧ "Удж" газетын 1921-ӧд вося май 29-ӧд лунӧ. ("Удж" газетсӧ ачым видзӧдлі 2018-ӧд вося гожӧмнас, сы бӧрын финн-йӧгра лабораториякӧд таблича лӧсьӧдім. Сэні тшӧтш пасйӧма — "Санԁрік Мікол".) Коді нӧ автор?

суббота, 29 августа 2020 г.

Тӧд вылӧ уси

Стӧч вит во сайын босьтчи коми кыв велӧдны. Кыдзи да мый артмис, важӧн ас блогӧ нин гижи. Чайта, оз ков выльысь висьтавны, кутшӧм донаторйӧн коми кыв меным лои. Быд лун сійӧн вӧдитча — лыддьыся да гижа, овлӧ — и сёрнита, овлӧ — и мӧвпала. Дерт, менам пай коми кыв сӧвмӧдӧмӧ зэв ичӧт. Ыджыд пай пуктӧмаӧсь да ӧні пуктӧны мукӧдъяс — и ме дугдывтӧг аттьӧала найӧс, а ачым вӧча мый кужа да мый удита.

Лыдди нин уна сикаса мича коми гижӧд, нимкодяси сійӧн. Аддзывла и мисьтӧмтор — кыдзи коми кыв сӧвмӧм мытшасьӧ йӧзлӧн йӧйлунӧ, веськодьлунӧ либӧ горшлунӧ — да жугыльтча сыысь. Но мичлуныс вынаджык. Ме ньӧти ог жалит, мый коми енкӧлаӧ пыри.


четверг, 20 августа 2020 г.

Неыджыд пасйӧд да нӧшта ӧти подстрочник

Важӧн нинӧм эг гижлы да, кад нин "ловзьыны". Медбӧръя тӧлысь чӧжыс "Ордым" журналысь гижӧдъяссӧ Коми онлайн небӧгаинӧ пукталі, Владимир Тиминлысь "Эжва Перымса зонка" ыджыд повесьтсӧ тексталі (FineReader'ӧн распознайті да прӧвериті) да нӧшта ӧти гырыськодь коми гижӧд текстуйті (набериті). Метроын ветлігӧн лыдди Иван Тороповлысь "Арся сьыланкыв" повесьтсӧ, Нина Куратовалысь "Аппассионата" да "Важ фотокарточка" висьтъяссӧ.

Удмурт кывйӧн зэв этша лыддьыси да гижи да, талун аслым тшӧкті петны "комфорт зонаысь". Босьтчи нуӧдны луннебӧгӧс "удмурт сямен": мый вӧчи, кутшӧм поводдя да мый да. Кута лача, сёрӧнджык интереснӧйджыкторъяс пасйыны велала.

Нӧшта Кузебай Гердлысь "Кам ёросын" ("Кама гӧгӧрын") кывбурсӧ талун лыдди (татысь; 21-ӧд лист бок). Со подстрочникыс:
"Вӧръяс, ыджыд вӧръяс, юяс, некор быртӧм тыяс, бара вӧръяс, помтӧм-дортӧм эрдъяс, видзӧдӧмӧн юрӧс пальӧдысь видзьяс. Кӧнкӧ жыннян гажтӧма бовгӧ, рудзӧг пӧвстын тӧв ӧтнас кышакылӧ, енэжас кодзувъяс дзирдалӧны-югъялӧны, сиктъясын йӧзыс номыръяс моз олӧны. Тані сьӧлӧмӧс нинӧм оз такӧд, лов кылӧмӧс нинӧм оз личӧд; сӧмын ылын сиктъяс ловзьӧны, вӧръяс кышӧдчӧмӧн матігӧгӧрӧс пальӧдӧны. Пӧрысь морт кодь, енэжыс кымӧра, гӧгӧр чӧв-лӧнь... букыш лун. Сӧмын Кама берегас нӧйтчӧ, эралӧмӧн резсьӧ, шондіа лун чуксалӧ!"

суббота, 18 июля 2020 г.

«Синтӧмалны колмас велӧдчыны...»

Тайӧ цитатасӧ медводзысь аддзи Альберт Ванеевлысь небӧгсӧ лыддигӧн: сійӧ вӧлі босьтӧма «Веглясян да педзан кадӧ олім» кывбурлы эпиграф пыдди. Тайӧ мича, но наивнӧй кывбурыс гижӧма вӧлі сёр перестройка кадӧ:

«Веглясян да педзан кадӧ олім:
Кӧсйӧмъяслы кӧвъялісны полӧм...»

«...Ӧні быттьӧ венім тірзян полӧм,
Да вот больгӧмӧн оз ладмы олӧм,
Ог кӧ кутӧй збыльысь зэлӧдчыны,
Уджсӧ бертны выльысь велӧдчыны.»


Регыдӧн Альберт Ванеев гӧгӧрвоӧма: перестройкасьыс сӧмын лёк лои. 1993-ӧд вося небӧгас  йӧзӧдӧма «Ми кыргорув лэччим...» кывбурсӧ:

«...Сісь кыв: перестройка
Дзик пыкӧс кодь, дой кодь
Да син водзын чераньвез дзуг...»

А «педзан кадыс» эз нин кажитчы сылы вывті омӧльӧн:

«...Но ӧд сэки ми эг корысялӧй-дзайгӧй,
И эз лысьтны чӧвтны кок уланым лы,
Нӧйтӧм понъясӧн сэк асьнымӧс эг чайтӧй,
Чужан му весьтаным кывліс сьылӧм шы...
»
(«Шузьӧм кад» кывбурысь)


Сёрӧнджык ме корси «Синтӧмавны ковмас велӧдчыны» цитата серти Иван Куратовлысь поэмасӧ («Пасъяс синтӧмлӧн»). Некымынысь нин сійӧс лыдди. Тайӧ автобиографическӧй поэма, но ме и сэсь некымын ас тӧдсаӧс аддзи. Шуам, казьтыштчис ыджыд мамлӧн нывъёртысме сы ордӧ кувтӧдзыс ветлывлі. Сійӧ вӧлі ӧтка пӧч, пӧшти синтӧм. Со тайӧ стрӧкаяссӧ лыддигӧн пырысьтӧм-пыр и усис тӧд вылӧ:

«Коркӧ, уна уджавліг, 
Виччысьлі ме гусьӧник 
Ойбыртан кад, вой, мед аски 
Бара пелька уджалас ки. 
Муніс тайӧ райса кад. 
Немкерӧм и пемыд — ад: 
Зарни асыв ог нин виччысь, 
Удж вылӧ ме ог нин мыччысь!
........

Коді мем, код чой-вок, код бур тӧдса,
Коді лёк йӧз — менам синлы пӧдса...
..........

Югыдтӧг и эбӧстӧг сэк эновтча,
Понда вӧймыны пыр лунысь-лунӧ...
Выльсӧ ог тӧд, важыс вунӧ,
Быд бур аддзывтӧг и лыддьытӧг.»


Нӧшта некымын тор поэмасьыс менӧ весиг синваӧдз вайӧдісны... А Гарпияяс йылысь лыддигӧн Тима Веньлӧн «Тӧв йыв Варыш» тӧд вылӧ усис. Со Иван Куратовлӧн:

«Тэ моз ми ог пӧдӧ муын, —
Гарпияяс раксӧны: —
Колльӧдам ми гу вылӧдзыд —
И бӧр карӧ — гуын кӧдзыд...

Паськыда ми югыд вылын
Гулюяскӧд, кутшъяскӧд
Лэбалам, ог гуӧ пырӧ...
Кув, эн пов! И шог сэн бырӧ!»


Лёк Гарпияяс лэбалӧны да синтӧм мортӧс гуӧ тойлалӧны. А «Тӧв йыв Варыш» поэмаын ӧбразыс дзик мӧдар: лэбалӧ повтӧм лэбач, а му вылын веглясьӧ лёк Гундыр. И мыйлакӧ мӧвп менам чужис: сёр перестройка да сы бӧрся кадӧ лёк Гарпияяс лэбавлісны да синтӧм йӧзӧс гуӧ тойлалісны, а ӧні Гундыръяс веглясьӧны да повтӧмджыкъяс вылын сералӧны. И тайӧ, и сійӧ — капитализм.


***

Талун Иван Куратовлӧн да Альберт Ванеевлӧн чужан лун. Медым жӧ коми йӧз оз синтӧмавны! Медым кутасны лыддьыны да пыдіа гӧгӧрвоны налысь гижӧдъяссӧ!

пятница, 3 июля 2020 г.

Монэ визьтэм шуо (Менӧ вежӧртӧмӧн шуӧны)

Тайӧ Куӟебай Гердлӧн кывбурыс. Петкӧдла сылысь коми подстрочник (оригиналсӧ позьӧ аддзыны татысь, 79-ӧд лист бок вылысь). Ачым абу гижысь да, серпаса комиӧдӧм лӧсьӧдны ог куж...

Со подстрочникыс:
"Удмурт войтырлы уджалӧмысь менӧ рочьяс вежӧртӧмӧн шуӧны. Коньӧр йӧзӧс садьмӧдӧмысь менӧ найӧ мустӧмтӧны. Недырся ёртъяс жӧ, уджысь полӧмла, дзик ӧткаӧн менӧ колисны: рочӧ пӧрӧмӧн асьнысӧ янӧдтӧг  рочьяслы уджавны петісны. Коньӧр айясыс, коньӧр мамъясыс! Мыйла найӧс чужтінныд? Войнас-луннас мырсьӧмӧн, мыйла найӧс видзинныд? Медым быдмӧм бӧраныс тіянӧс ӧткаӧн няйт пӧвстын колисны? Медым удмурт войтырысь яндысиг удмуртъясӧс мустӧмтісны?.."

вторник, 2 июня 2020 г.

Укно улын чебер льӧмпу, чебер льӧмпу някыръяське...

Комиӧн кӧ, "Ӧшинь улын мича льӧмпу, мича льӧмпу кусыньтчӧ..." 

Тайӧ Кузебай Гердлӧн "Сяськаяськись льӧмпу" ("Дзоридзалысь льӧмпу") кывбурысь медводдза визь. Кывбурыс зэв мича, жаль, ӧнӧдз некод абу комиӧдӧма сійӧс. 

Апрель помын виччысьтӧг тӧдмалі: Ольга Урасинова нуӧдӧ "Удмурт кыл карантин дыръя" онлайн-семинар. Неуна велӧдышті удмурт кыв да, Кузебай Гердлысь вит гижӧд верми нин гӧгӧрвоны (кывкуд отсӧгӧн, дерт). На пиысь кыкыс комиӧдӧма: "Уй..." ("Войын...") да "Толэзь" ("Тӧлысь").

Зэв кыпыд кывбур "Сяськаяськись музъем" ("Дзоридзалысь му"). Кывбуралысь пӧ сиктысь сиктӧ ветлігӧн шензьӧ выль шуда му понда. Гӧгӧр дзоридзьяс, шонді югъялӧ-дзирдалӧ, пионеръяс-комсомолечьяс-коммунистъяс водзӧ мунӧны... Сэтшӧм сяма 20-ӧд воясся кывбуръяс нимкодь лыддьыны (тайӧ збыльысь югыд аскиа лунӧ эскӧм, абу сёрджык кадся вылісянь тшӧктӧм серти гижӧм официоз; чайта, и ӧнія кадӧ позьӧ комиӧдны найӧс). Кӧть сэсся авторъясыслӧн вывті водз орӧм олӧм понда и жугыльтчан.

Нӧшта ӧти кывбурыслӧн со кутшӧм шӧр мӧвп: "Тулыснас му дзоридзалӧ чӧскыд вотӧс гӧрддзасьӧм понда, миян олӧм дзоридзалӧ шуда кад чужӧм понда. Кывбуралысьлӧн кывбуръясыс, сьӧлӧмыслӧн дзоридзьясыс, нига пытшкын дзоридзалӧ сьӧлӧмкылӧм ызйӧдӧм понда". Тӧд вылӧ усьӧ Тима Веньлӧн "Тайӧ кывъясас  войвыв дзоридзьяс".

Омӧля на тӧда удмурт кыв, гижигӧн кывкудӧ да грамматика конспектӧ пыр видзӧдла, но коркӧ и комиӧн сідзи жӧ гижи. Водзӧ велӧдчыны кута.

понедельник, 11 мая 2020 г.

"Интерлюдия"

Ӧнія сьӧкыд кадӧ коми блогйысьяс ланьтӧмаӧсь да, бара меным колӧ эськӧ кыв-мӧд пасйыштны. (Ыджыд аттьӧ Алёна Тувсовъялы, неважӧн ӧти гижӧд лӧсьӧдӧма да.) Велӧдӧм паськӧдан блогӧ сёрӧнджык выль текст кута дасьтыны, ӧти здукӧн сійӧс он вӧч.

Коркӧ менам план вӧлі: юнь тӧлысьӧ Сыктывкарӧ ветлыны, Куратов музейысь 1921-ӧд вося "Удж" газетысь коми гижӧд текстуйтны либӧ фотографируйтны, водзӧ "Ордым" журналысь гижӧдъяс кузя юаланторъяс Ӧньӧ Лавкӧд видлавны (сэсся позяс найӧс Коми онлайн небӧгаинӧ содтыны)... Ӧні весиг ог тӧд — артмас оз гожӧмнас Комиӧ веськавны. Университетын пӧ кӧсйӧны экзаменъяс онлайн нуӧдны.

Но мыйсюрӧ вӧчышта коми кыв кузя: "90 во сайся гижӧд" да "Математика комиӧн" котыръясӧ юнь тӧлысь помӧдз гижӧд содті ("Сёрни-басни"-ӧ эг на удит), помалі "Выль туйӧд" небӧгысь текстъяс лыддьыны, ӧні найӧс Коми онлайн небӧгаинӧ содтала. Та водзын "Югыд туй"-са коми гижӧдъяс кузя лист бок Коми тӧданінын выльмӧдышті. Ӧльӧксан Шебыревлысь "Фараон" небӧгсӧ лыддя. (Сы йылысь абу на дась гижны, колӧ бура мӧвпавны.)

суббота, 18 апреля 2020 г.

"Ме пӧ прамӧй коми морт, но..."

Вывті тшӧкыда тайӧ фразаыс контактын паныдасьлӧ. "Прамӧй коми йӧз" ставсьыс ӧлӧдӧны: "ӧтуввез" пӧ гижны оз позь (ӧтуввез — тайӧ интернет, коми кыв велӧдігӧн на тӧдмалі), математика йылысь пӧ комиӧн гижны оз позь. "Мӧскуа" кӧ гижан — мый сӧмын оз шуны... и быттьӧкӧ кодӧскӧ увтыртан, и быттьӧкӧ чайтан, мый Мӧскуа — коми кар... Вӧлӧмкӧ, эмӧсь "прамӧй коми йӧз", кодъяс шуӧны: Ыджыд тыш йылысь роч сьыланкывъяс комиӧдны "некорректно". И весиг оз аддзыны: тайӧ коми кыв увтыртӧм. Комияслӧн абу ӧмӧй право Ыджыд тыш йылысь сьывны? Коми кывйӧн оз ӧмӧй позь ыджыдтор йылысь гижны? Кутшӧмкӧ комиӧдӧмыс кӧ оз кажитчы — мыйла оз позь тайӧ вуджӧдӧмсӧ техника боксянь критикуйтны, медым сэсся мичаджык да шыльыдджык вариант кодкӧ лӧсьӧдіс? (А гашкӧ, эм нин?) Мыйла колӧ роч националист моз гижны?
Коньӧр коми йӧз... Шог. Зэв шог.

PS Ме чайта, Александра Паршуковалӧн "Ичӧт пач пытшкын ломалӧ би" комиӧдӧмыс зэв лӧсьыд.

четверг, 9 апреля 2020 г.

Бара "кӧза пленын"...

Кӧсйыси мыйсюрӧ гижны  коми грамматикаса некымын термин йылысь (кутшӧм да кутшӧм гижӧдын найӧ паныдасьлісны 1939–1986 воясын), но пытшкӧсса социофоб ӧлӧдіс менӧ: йӧзыс пӧ ӧні шогсьӧны эпидемия понда, а ме сёрникузяясӧн да эмакывъясӧн сюйся...
Бара "кӧза пленын", но уджала да финн-йӧгра лабораториялы отсасьышта. Неважӧн Илля Васьлысь луннебӧгсӧ коми онлайн небӧгаинӧ пукті: прӧвериті Войвыв кодзув журнал серти лӧсьӧдӧм текст файл, сэсся  гижӧдсӧ небӧгаинӧ пукті хронология серти лӧсьӧдӧмӧн (кыдзи вӧчӧма "Арт" журналын), да нӧшта мыйсюрӧ ладмӧдышті "Арт"-ын публикация серти. Ӧні Коми тӧданінын водзмӧстча: Войвыв кодзув журналын бӧръя кадӧ йӧзӧдӧм йылысь юӧр автор лист бокъясӧ содтала.
Водзӧ лыддя Геннадий Юшковӧс. Кыв-мӧд пасйышта "Аски лоӧ мича" висьт йылысь. Медшӧр героиня, Рая, сиктса зіль ань, гортӧ воис сёрӧн (биыс фермаын куслі да), верӧсыс да энькаыс видчӧны: вывті пӧ зіля уджалан, активисталан пӧ, партияӧ пырны пӧ кӧсъян, пӧжар пӧ коркӧ кусӧдін да кутшӧм пальто пӧ вайин, ныв-пи пӧ абу на... Пинясисны да, Рая на ордысь муніс. (Нӧшта и верӧсыс мустӧм вӧлі.) А сиктса йӧзыслӧн видзӧдлас унджыкыслӧн важкадся. Мамыс гортӧ эз лэдз, Рита (кодкӧд Рая ӧтлаын велӧдчис) сійӧс эз гӧгӧрво (сылӧн верӧсыс дзик нин лёк, вина юысь)... А мый шуис партактивист Африкан Иванович? Огӧ пӧ и босьтӧй партияӧ. "Семьятӧ кисьтан? Кисьтан. А мый программаыд по этому поводу шуӧма? Быд ногыс, всемерно укреплять семью". Со кутшӧм лоины "коммунистъяс" дудан (застой) кадӧ: важ оласногкӧд озджык нин тышкасьны; сиктъясын патриархальщина абу на бырӧма — но сы вылӧ видзӧдтӧг Африкан Иванович моз семья "укрепляйтӧны". Наросьнӧ эг гиж "ёнмӧдны", тадзи ёнмӧдӧм оз артмы да. (Колӧ шуны, висьтын петкӧдлӧма и тӧлка ань, Социалина Михайловна, коді кӧсйысис ставсӧ ладмӧдны.)
Нӧшта Гаврив Пёдорлысь (перым коми гижысьлысь) кывбуръяс лыддьышті. Со кыдзи сійӧ зыряна комияс ордӧ шыӧдчӧ:


"Ми кыкнанным
Тэкӧт коми,
Миян ӧтік
Чужанін.
Кадыс локтіс
Ӧтлаасьны 
Керны
Ӧтік оланін."

Эскӧмаӧсь комияс колян нэмся 20-ӧд воясын югыд аскиалунӧ...

А тадзи "Варыш" кывбур заводитчӧ:


"Ок, мыля ог вермы
Варыш моз лэбавны?
Ок, мыля ме ог куж
Му вывті гӧгравны?.."


Да, некытчӧ он лэб...

пятница, 3 апреля 2020 г.

Кыв-мӧд гижышта...

Выльлунӧ помалі "Ордым" журналъяс лыддьыны 1929-ӧд вося 12-ӧд номерӧдз (текст файлъяс прӧверайтны). Ода-кора тӧлыссянь тайӧ уджсӧ вӧчам финн-йӧгра лабораториякӧд. Колис сӧмын юаланторъяс да гӧгӧрвотӧминъяс видлавны. 1930-ӧд вося номеръяс абу на тексталӧмаӧсь.



Текстуйті да Коми онлайн небӧгаинӧ пукті 1921-ӧд вося "Югыд туй" газетысь некымын текст (найӧс Ленинкаысь аддзи да тетрадьӧ гижи). Сэсся бара ковмас Молодцов текст оригиналкӧд орччӧдны: коми кыв корпусӧ ставсӧ колӧ стӧча гижны, а эм кӧ ӧпечатка да веськӧдлан кӧ сійӧс, вежӧминсӧ быть колӧ пасйыны.


среда, 25 марта 2020 г.

Нӧшта кыв-мӧд коми кыв учебникъяс йылысь

Неважӧн лыдди "Коми му" газетысь Т.А. Каневалысь ("Мыйла нӧ тшыкӧднысӧ?"; 19.03.2020) гижӧдсӧ. Медшӧр мӧвпыс со кутшӧм: ӧнія учебникъясын "небыд, мича, гора" кыв пыдди тшыкӧдӧм кыв да, та вӧсна бать-мам оз и бӧрйыны коми кыв кыдзи чужан кыв. Ме ог шу, мый некутшӧм проблема абу. Но лыддян кӧ статьясӧ, верман чайтны: быд упражненньӧ — тайӧ вылькыв тыра текст. Тадзи быдӧн повзяс дай бӧръяс роч кыв...
Авторыс пример пыдди вайӧдӧ нёльӧд класслы небӧг. Менам эм упражненньӧ чукӧр (Э.И. Полякова, Т.И. Прокушева, "Коми сёрни", 2013-ӧд во; газетын, буракӧ, сы йылысь сёрниыс). 
Медводз ме текстъяс йылысь шуа: пӧшти ставсӧ коми прозаысь да поэзияысь босьтӧма. Мыйсюрӧ петкӧдла:
1) Иван Тороповлысь текст:


2) Александра Мишариналысь:


3) Михаил Елькинлысь:


4) Альберт Ванеевлысь:

5) Виктор Напалковлысь:


6) Елена Козловалысь:


7) Василий Лодыгинлысь:



(Дерт, пыді анализ вӧчны ог вермы, колӧ ставсӧ дыр видлавны.)


Мӧдарсянь, небӧгас сюйӧма зэв уна комиӧдӧм грамматика термин (гӧгӧрвоӧдтӧг), йӧзлы тайӧ збыльысь оз кажитчы. Кутшӧмкӧ компромисс, буракӧ, колӧ. Но пырысьтӧм-пыр выль учебникъяс он вермы лэдзны. Куш роч терминология кольны абу жӧ бур мӧвп: ӧти-кӧ, кутшӧмсюрӧ терминъяс сӧвет кадӧ на комиӧдӧмаӧсь (шуам, сёрникузя — предложение, эмакыв — существительное, кадакыв — глагол), мӧд-кӧ, дзик нинӧм кӧ абу, лёк йӧз коми кывсӧ увтыртны вермасны. Та вӧсна колӧ сетны велӧдчысьяслы отсӧг да нуӧдны став комияскӧд югдӧдчан удж: 1) медым тӧдтӧм кывъяссӧ ставыс вермисны кокньыда аддзыны кывкудйысь, 2) медым йӧз эз паськӧдны прӧвериттӧм информация (овлӧ: кодсюрӧ лӧсьӧдас кутшӧмкӧ зэв мисьтӧм кывтэчас дай висьталас — тайӧ пӧ гижӧма ӧнія учебникъясын,  а мукӧдъяс сылы эскӧны), 3) медым йӧз тӧдісны сӧветкадся комиӧдчан удж йылысь.


среда, 18 марта 2020 г.

Ордымъяс лыддигӧн...

...Ыджыд тыш йылысь мӧвпавны заводита. Мый тайӧ том пионеръяскӧд лои? Со кык цитата.

Выль Паш, "Миянӧс вежысьяс" кывбурысь ("Ордым", 1929 № 5).

"Тувсовъя дзоридзӧн быдмӧны найӧ...

Сьӧлӧмъяс нимкодьӧсь миян:
Гырысьӧс вежысьяс петӧны тайӧ —
Олӧмлӧн выль нога пиян.
Видзӧд, со мунӧны туй кузя стройӧн,
Сьылӧмыс гораа кылӧ.
Ставныс дзик нимкодьӧсь. Мунӧны сёӧн...
Барабан юралӧ ылӧ.
Челядьлӧн олӧмӧн чужӧмныс ӧзйӧ..."


Жугыль, "Сімсьӧд кымӧр моз" пьесаысь ("Ордым", 1929 № 10):

"ПӦЛЬӦ: ... Гриша, тэ эн вунӧд батьтӧ, Гришатӧ... ло Гриша кодь жӧ. Сійӧ нима тэ, сійӧ сьӧлӧма жӧ ло. Сійӧ пыр ми кодьяс вӧсна тӧждысьліс.

ГРИША. Ог вунӧд, дерт. Найӧс шой вылын ӧд и ми бурасӧ овмӧдчим. Тыштӧг пӧ та выйӧдзсӧ ми эгӧ и волӧй, — шулывлӧ ячейкаса секретар. Водзӧ на пӧ лоӧ тышыд дай... Ми, пӧльӧ, тышкасям на, ёна тышкасям, мед венам дзикӧдз (кылӧ пионерскӧй рожоклӧн ворсӧм)..."