Стӧч вит во сайын босьтчи коми кыв велӧдны. Кыдзи да мый артмис, важӧн ас блогӧ нин гижи. Чайта, оз ков выльысь висьтавны, кутшӧм донаторйӧн коми кыв меным лои. Быд лун сійӧн вӧдитча — лыддьыся да гижа, овлӧ — и сёрнита, овлӧ — и мӧвпала. Дерт, менам пай коми кыв сӧвмӧдӧмӧ зэв ичӧт. Ыджыд пай пуктӧмаӧсь да ӧні пуктӧны мукӧдъяс — и ме дугдывтӧг аттьӧала найӧс, а ачым вӧча мый кужа да мый удита.
Лыдди нин уна сикаса мича коми гижӧд, нимкодяси сійӧн. Аддзывла и мисьтӧмтор — кыдзи коми кыв сӧвмӧм мытшасьӧ йӧзлӧн йӧйлунӧ, веськодьлунӧ либӧ горшлунӧ — да жугыльтча сыысь. Но мичлуныс вынаджык. Ме ньӧти ог жалит, мый коми енкӧлаӧ пыри.
Комментариев нет:
Отправить комментарий