Илля Васьлӧн "Шудлун" кывбур йылысь

Шойччан лунъясӧ содтавлі Коми онлайн небӧгаинӧ Илля Васьлысь кывбуръяссӧ ("Дзордзав жӧ, Коми му" небӧгсӧ финн-йӧгра лаборатория важӧн нин пуктӧма, но унакодь гижӧд кольӧма: 1929 вося кывбур чукӧрысь, журналъясысь да с. в.). Ставсӧ сэсся выльысь  видлавны ковмас: унатор текстуйті (набирайті), юаланторъяс эмӧсь и.

Талун пасйышта "Шудлун" кывбур йылысь (1921 вося). Коми тӧданін сайтын сӧмын ӧти ӧшмӧс петкӧдлӧма вӧлі: 1995-ӧд вося "Мелілуныс пыдӧстӧм и помтӧм" небӧг. Лыдди кывбурсӧ да Тима Веньлӧн "Кӧнкӧ, веж турун пӧвст" казьтыштчис, янсӧдчӧм йылысь уна гижӧд тӧд вылӧ усис и. Друг мӧвпышті: гашкӧ, нӧшта кӧнкӧ "Шудлун"-ыс эм? Гашкӧ, мӧд нимӧн йӧзӧдӧма вӧлі да, пукті нин сійӧс небӧгаинӧ, сэсся вунӧді?
Корси коми кыв корпус отсӧгӧн (фраза серти)... збыльысь тай эм кывбурыс, Георгий Торлоповлӧн "Кыдзи сійӧ босьтчис" статьяын ("Войвыв кодзув", 1995 №12). Вӧлӧмкӧ, оригиналыс кузьджык, дай идеяыс дзик мӧд. "Мелілуныс..." небӧгын геройыс садьмӧ да гӧгӧрвоӧ: мича нылыс — тайӧ сӧмын вӧт. Тадзи гижӧдыс и помасьӧ. А оригиналын сэсся петкӧдлӧма мисьтӧм барак, кӧні салдатъяс шкоргӧны-узьӧны, син сёйысь сьӧд тшын — война ад. Татшӧмторсӧ лыддьӧм бӧрын он нин вунӧд.

PS "Шудлун" кывбурыс тані.

Йӧй мортлӧн кӧсйӧм

Гажтӧмтча ме "Коми блогйысь" котырсӧ нуӧдігӧн: вывті гежӧда выль гижӧдъяс петавлӧны. И медся жаль, мый Арся блог некымын во чӧж нин узьӧ. Пасйӧдъясыс ӧнӧдз ышӧдӧны менӧ да менсьым ёртъясӧс... Мӧдарсянь, абу жӧ лӧсьыд "корны сьывны арся сьыланкывтӧ". Дай кадыс ӧні сьӧкыдджык 2014-16 вояс серти... А ышӧдысь меысь, дерт, омӧлик. Сідзкӧ, лача пӧшти ог и кут. Ставыс тайӧ — йӧй мортлӧн кӧсйӧм.

Ачым видла тшӧкыдджыка гижавны "Пасйӧдъяс" блогӧ. Быд лун нокся кутшӧмкӧ коми гижӧдӧн, интереснӧйторъяс тшӧкыда жӧ паныдасьлӧны. Позяс на йылысь дженьыдика пасйыштны. Жаль сӧмын, мича да серпаса коми кывйӧн вӧдитчыны ог куж, энӧ дивитӧй...