воскресенье, 9 декабря 2018 г.

МАРИ ГИЖӦД ЛУНӦН!


Ӧшым тӧлысь 10-ӧд лун – мари гижӧд лун. Аддзи та йылысь юӧртӧм “Коми енкӧла” котырысь да босьтчи пуктавны сэтчӧ комиӧдӧм мари кывбуръяс: и аслым ликбез нуӧді, и коми йӧзӧс тӧдмӧдышті мари гижӧдӧн. 


Таысь кындзи, лӧсьӧді Коми тӧданін сайтын “Комиӧдӧм мари гижӧд” лист бок. Гашкӧ, эг ставсӧ пукты; тӧданныд кӧ нӧшта кутшӧмкӧ гижӧд йылысь, висьталӧй. Алексей Бахтинлӧн кывбуръяс лист бок вылас абуӧсь, сійӧ рочӧн гижис да. 




Жаль, вывті этша важ мари гижӧд комиӧдӧма. Со мый лыдди ӧтуввезйысь: 1907-ӧд восянь 1913-ӧд воӧдз “Марла календарь” быд вося журналын йӧзӧдӧмаӧсь мари гижӧд (ёнджыкасӧ кывбуръяс, сёрӧнджык петавлісны ворсанторъяс да проза). Мари литература подув пуктысьяс пиын вӧліны Сергей Чавайн, Валериан Васильев (сылӧн вӧлі Ӱпымарий гусяним – Уфаысь мари; чужан нимыс – Вастаев Темьян Гайсинович), Гурий Кармазин (Эвайн), Г. Микай (сійӧ жӧ Михаил Степанович Герасимов), Павел Глезденёв (чужан нимыс Мендиарын Ислам-Гарей, литература гусянимыс Пагул Ача), Александр Конаков да мукӧдъяс. А комиӧдӧма сӧмын Сергей Чавайнлысь куим кывбур: “Рас”, “Асыв” да “Мелі-мыла миян сьылӧм...”. Революция бӧрын литератураӧ пырисны Никон Игнатьев, Шабдар Осып (Шабдаров Иосиф Архипович), М. Шкетан (Яков Майоров), Андрей Эшкинин... но налысь некутшӧм  комиӧдӧм гижӧдтор ме эг вермы аддзыны. Со и артмӧ: медым бурджыка тӧдмасьны “братскӧй литератураӧн” (кыдзи гижлӧмаӧсь 1950-60-ӧд воясся “Войвыв кодзув” журналын), колӧ либӧ роч вылӧ вуджӧдӧм лыддьыны, либӧ мари кыв велӧдны. Лоа зэв рад, коми гижысьяс кӧ ышӧдчасны да комиӧдасны мыйсюрӧ мари литература классикаысь!

PS Став йӧзӧс, коді тӧдӧ мари кыв – чолӧмала!

суббота, 24 ноября 2018 г.

Ӧти коми морт аддзис: ме "Мӧскуа" гижа...

...да босьтчис менӧ "велӧдны": Москва пӧ дзик роч кар, а "Мӧскуа" - тайӧ "басни". 

Корсьышті коми кыв корпусӧн "Мӧскуа" кывсӧ сӧветскӧй литератураысь 1940-1980 кад коласт индӧмӧн. Тайӧ кыв паныдасьлӧ Иван Куратовлӧн, Юрий Васютовлӧн, Геннадий Юшковлӧн, Нёбдінса Витторлӧн, Тима Веньлӧн, Николай Белыхлӧн гижӧдъясын. Кӧть сійӧ кадӧ зільӧмаӧсь гижны матынджык роч кыв дінӧ. 

Петкӧдла некымын серпас.

Тима Вень, "Всемирнӧй съезд" // "Менам гора тулыс", 1980. Оригинал менам абу; сійӧ печатайтӧма "Вӧрлэдзысь" газетын 1934 вося сентябрь 28 да 30-ӧд лунъясӧ, сэсся "Ударник" журналын (1934, 8-10№). 


Тима Вень, "Кыв-мӧд пӧль пӧльяс йылысь" ("Менам гора тулыс" небӧгын гижӧма "Мӧскуа" да оригиналын сідзи жӧ). Петкӧдла оригинал - 1928-ӧд вося Тима Веньлӧн небӧгысь фрагмент.



Нёбдінса Виттор, "Станция Сыктывдін кар".
1) 1931-ӧд вося гижӧд чукӧр.


2) 1932-ӧд вося география велӧдан небӧг.


Геннадий Юшков, "Отсӧг" кывбурысь ("Ленин йылысь кывбуръяс", 1969).


Геннадий Юшков, "Чугра" романысь ("Войвыв кодзув", 1978, №7).






воскресенье, 11 ноября 2018 г.

Барнум эффект (мыйла йӧзыс гороскоплы эскӧны)

1948-ӧд воын америкаса психолог Бертрам Форер нуӧдіс эксперимент. Сійӧ сетіс студентъясыслы тест да результат сертиыс кӧсйысис тӧдмавны налысь сямсӧ. Сӧмын збыль характеристика пыдди Форер ставныслы петкӧдліс гороскопысь босьтӧм дзик ӧти гижӧд. Сэсся став студентсӧ корис донъявны гижӧдсӧ вит балла шкала серти – лӧсялӧ оз характеристикаыс налӧн сямлы. Шӧр баллӧн лоис 4,26. 

Сёрӧнджык сэтшӧм экспериментсӧ нуӧдлӧма уна туялысь. 

Сідзкӧ, мортыс зэв вылӧ пуктӧ сям йывсьыс кык ногӧн гӧгӧрвоана висьталӧм. Пырджык сійӧ чайтӧ: тайӧ серпасалӧмыс лӧсялӧ буретш сылы. 

Тайӧ феноменыс шусьӧ Барнум эффектӧн (Фрэнсис Барнум – америкаса шоумен). Буретш Барнум эффект вӧсна унаӧн эскӧны астрологиялы, хиромантиялы да мукӧд ылӧдчӧмлы.




PS Ыджыд аттьӧ ставыслы редактируйтӧмысь!

пятница, 28 сентября 2018 г.

Кык вӧтысь вӧт (со мый менам артмис Баяр Любалысь да Ӧльӧш Иванлысь гижӧдъяс лыддьӧм бӧрын)

Тайӧ юыс важ кадӧ нуӧ. 
(Сэні сьӧд вой, кӧть сынӧдыс сӧдзджык.) 
Кодкӧ чуксалӧ: “Кывтам вай, пуксьы!” 

Воча шыаси: “Пемыдлань? Нинӧмла! 
Быттьӧ йирын пӧда сэн регыдӧн,
Ог нин вермы аддзыны шондісӧ”. 

...Тані руа, кӧть енэжыс югыдджык.
Ставыс гудыр – дзугся да ылала,
Шонді мыгӧрсӧ весьшӧрӧ корся. 

Кыла мӧд гӧлӧс: “Мунам вай катчӧс!
Олӧм йылысь збыль тэныд висьтала. 
Коді сӧрӧ да ылӧдчӧ – петкӧдла.” 

Кывтысь пыжаыс горӧдіс: “Нинӧмла 
Тэныд катны!” Визулыс ӧддзис... 
Садьми. “Вӧтӧн шогмӧ пӧ аддзыны...”


***

Босьті ӧбразъяс Баяр Любалӧн "Менам вӧтъяс" кывбурысь (ру, кольӧм кадӧ нуысь ю, пыж); содті Ӧльӧш Иванлӧн кывбуръясысь мӧвпъяс ("Пемыд", "Пыж", "Вӧтъяс"). Йиті да орччаалі важ да ӧнія кад...







PS Ставыслы аттьӧ критикаысь!

среда, 29 августа 2018 г.

***

(Гижи тулыснас, сэсся вежышті.)

Ичӧт лэбачыс
Воліс сы дінӧ -
Вайліс енэжсӧ,
Ловсӧ, эбӧссӧ...
Чужис кывбурыс - 
Збыльысь яръюгыд!

Коркӧ воас-ӧ
Повтӧм варышыс?

суббота, 25 августа 2018 г.

ОБРАЗӦН-ШТАМПӦН

1.
Ӧльӧш Иван
Шонді виччысьӧ
Ю паныд катігӧн
Пемыд войын.


2.
Шонді петігӧн
Дзоридз косьмӧ.
Кыа петігӧн
Домнаӧс виӧны.

3.
Гӧгӧр гижӧма:
"Югӧр", "Кыа"...
Петкӧдлам тайӧн:
Шонділань мунам!


4.
Чусмӧ, кельдӧдӧ
Мича образыс...
Педзам, сулалам,
Водзӧ ог мунӧй.


5.
Енэж пӧртмасьӧ,
Ворсӧ рӧмъясӧн.
Шонді лэччӧм
Огӧ казялӧй.


6.
Уна рӧма
Реклама биӧн
Туйнымӧс югдӧдам 

Асьнымӧс ылӧдлам.





PS Аттьӧ бур йӧзлы критикаысь!



суббота, 11 августа 2018 г.

А ШТЭЙН ДА ФАРШТЭЙН




“Изъяс – менам
шыльӧдтӧм гижӧдъяс.
Наын сы мында мӧвпыс...”
(Л. Ануфриева)


Минералогия музейын.

Геолог (ичӧт пилы). Изъяс унатор вермӧны висьтавны: кор найӧ чужӧмаӧсь, кыдзи быдмӧмаӧсь, кутшӧм мукӧд минералъяс налӧн куйланінас вермасны лоны...

Математик. Ок, кужи кӧ ме лӧсьӧдны из артмӧм йылысь стӧч модель, гижны стӧч ӧтвесьт* да стӧча тӧдмавны сійӧс, медым “перӧ помсянь” петіс буретш тайӧ серпасыс... Оз на тырмы мортыдлӧн сямыс!

Гижысь. Тайӧ из веркӧс вывса серпасас быттьӧ эм кутшӧмкӧ шыӧдчӧм, зэв джуджыд мӧвпа... Но гижӧма сійӧ вунӧдӧм кывйӧн, кодӧс некод некор оз нин гӧгӧрво.

Мӧд гижысь. Сійӧ быттьӧ философ, коді кӧсйис стӧч-стӧча гӧгӧрвоны, мый тайӧ – “нинӧм”*, та вӧсна пӧрис изйӧ, но мӧвпавны эз нин куж да выльысь лоны мортӧн эз вермы.

Жугыль серпасалысь. Ме майшася, корся выль формаяс, творчество кризисысь петны ӧнӧдз ог вермы... А тайӧ из вылас серыс сё пӧв мичаджык да шемӧсмӧданаджык Европаясын велӧдчӧм ӧнія интеллектуалъяслӧн картинаясысь!

Ӧти зон. Жӧдзӧны со тані йӧз, видзӧдӧны тайӧ из вылас... А сійӧ найӧс оз и казяв. Эм контактын ӧти котыр – “Вӧрын куйлысь из”. Быд лун петӧ гижӧд из нимсянь – “талун нинӧм эз ло”.

Мӧд зон. Да сійӧ весиг оз вермы гӧгӧрвоны да мӧвпавны – лоис эз мыйкӧ талун. Татшӧмӧн жӧ вӧлі буракӧ миян енкӧланым морт садь чужтӧдз...

Ныв. Колӧ шуны, ӧтуввезйысь тӧрыт лыдди “Тум-балалайка”* сьыланкыв йылысь. Эм пӧ кык версия, кыдзи гӧгӧрвоны сэтысь ӧти строка: либӧ “а штэйн кен ваксэн, ваксэн он рейгн” (“из вермӧ быдмыны, быдмыны зэртӧг”), либӧ “фарштэйн кен ваксэн, ваксэн он рейгн” (“гӧгӧрвоӧм вермӧ быдмыны, быдмыны зэртӧг”)? Кыдзи чайтанныд?

* ӧтвесьт (термин) — уравненньӧ; ӧтвесьт тӧдмавны — уравненньӧ решитны
* Нинӧм (ничто) йылысь философъяс збыльысь гижлывлӧмаӧсь.
* Еврей сьыланкыв. Сюжет серти, зон кӧсйӧ тӧдмасьны нывкӧд да нӧдӧ сылы нӧдкывъяс: “Мый вермӧ быдмыны зэртӧг?”, “Мый вермӧ ӧзъявны помтӧг?”, “Мый вермӧ бӧрдны?” А нылыс сылы вочавидзӧ: “Из (мӧд версия серти – гӧгӧрвоӧм) вермӧ быдмыны зэртӧг”, “Муслун вермӧ ӧзъявны помтӧг”, “Сьӧлӧм вермӧ бӧрдны”.



PS Ыджыд аттьӧ отсасьысьяслы критикаысь!


суббота, 9 июня 2018 г.

Туйвеж Коноша бӧрын

Войвылӧ муна. 
Коноша бӧрын 
Кӧрт туйыс вожалӧ - 
Тӧд вылӧ уськӧдӧ 
Выльӧс да важӧс.

Ӧти вож туйыслӧн
Кардорӧ нуӧ.
Сэні ме вошті
Коркӧя шудӧс,
Томдырся гажӧс.

Мӧд вожыс нуӧ 
Комиӧ. Сэтысь 
Выль шудӧс босьті - 
Тӧждысьтӧмлунӧн 
Вештыси сыысь.


PS Ыджыд аттьӧ бур йӧзлы критикаысь да отсӧгысь.


четверг, 24 мая 2018 г.

КОМИ ЙӦЗ, ДУГДӦЙ ӦТА-МӦДӦС МЫЖДЫНЫ!


(Энӧ гижӧй дзик пыр комментарийяс! Медводз лыддьӧй текст дзоньнас да сюся.)

Во кык-ӧ куим сайын тӧдмалі выль кыв – виктимблэйминг (тайӧ вись мыждӧм; пырӧма англичан кывйысь: victim – вись, жертва; to blame – мыждыны). Шуам, кодлыськӧ гусялӧмаӧсь кӧлуйсӧ, сійӧ висьталӧ та йылысь ӧтуввезйын (либӧ та йылысь гижӧны статья). Дзик пыр тшак моз петӧны комментаторъяс, кодъяс шуӧны, ачыд пӧ мыжа, колӧ пӧ бурджыка кӧлуйтӧ видзны да с. в. Кодлы таысь бур? Гусясьысьяслы. Либӧ гижӧны мырдӧналӧм (насилуйтӧм) йылысь. Сэки уна сикаса ханжаяс, гуга-бана шаньгаяс юалӧны: “Кыдзи вӧлі пасьтасьӧма висьыс? Мыйла сёр рытнас вӧлі ывла вылын? Мыйла эз пышйы?” (Кодкӧ на пиысь вермӧ лоны тролльӧн либӧ аньясӧс дзик оз пыдди пукты, а кодкӧ вермӧ лоны и прӧстӧй мортӧн, весиг нывбабаяс гижӧны татшӧмтор.) Кодлы таысь бур? Мырдӧналысьяслы (насилуйтысьяслы). Йӧзыс быттьӧ вунӧдӧны: коді преступник – ӧд сійӧ и мыжа.

Со и коми йӧз пинясьӧны-зыксьӧны, ӧта-мӧдӧс мыждӧны. Неважӧн “Коми енкӧла” котырын петіс гижӧд ӧнія ситуация школаясын йылысь: оланпаслы (законлы) паныд нуӧдӧны анкетируйтӧм, кӧнсюрӧ тшӧктӧны бӧрйыны роч кыв кыдзи чужан кыв. Мӧд ногӧн кӧ, мырддьӧны комияслысь чужан кывсӧ (со татшӧм “мезд” да “ас вӧля серти бӧрйӧм”). Колӧ эськӧ ӧтувтчыны, водзсасьны, ӧта-мӧдыслы отсавны... А со мый гижис ӧти коми комментатор (дерт, рочӧн, медым став тролльяс-вӧрӧгъяс аддзисны; ме гижӧдсӧ чышки): “А сы вӧсна мый коми кывсӧ тшыкӧдӧмаӧсь”. Сідзкӧ филологъяс челядьлӧн да налӧн бать-мамлӧн вын вылӧ лишнӧй надейтчисны да та понда лёк неолибералъяс закон торкалӧны? (А тайӧ буретш неолиберальнӧй реформаыс: чинтӧм, топӧдӧм, “оптимизируйтӧм”.) Кодлы лоас пӧльза тайӧ вись мыждӧмсьыс (тані висьыс, жертваыс – коми культура)? Сӧмын горш чиновникъяслы да коми кыв вӧрӧгъяслы.

Менам эм некымын велӧдан небӧглӧн скан (1–4 класслы, 2010–2013-ӧд восяяс, коми кыв кыдз чужан кыв). Дзоньнас ме найӧс, дерт, эг лыддьы. Колӧ пыді видлалӧм-анализ. Менам медводдза донъялӧм со кутшӧм (сӧмын энӧ вунӧдӧй: ме абу специалист, да гырысьджык классъяслы небӧгъяс менам абуӧсь). Сэтчӧ пыртӧмаӧсь коми гижысьяслӧн висьтъясысь либӧ кывбуръясысь торъяс. Тайӧ, дерт, абу “тшыкӧдӧм” коми кыв. Гашкӧ, терминъяс вылӧ лёк реакция? Ӧтарсянь, терминологияыс – абу кыв тшыкӧдӧм. Мӧдарсянь, йӧзыслӧн кӧ паника быд тӧдтӧм кыв вӧсна, колӧ бурджык велӧдан методика, нӧшта колӧ эськӧ мӧвпавны, уна-ӧ теория колӧ школаса уджтаслы (программалы). Коми кыв велӧдан медтӧдчана мог – медым мортыд кужис грамотнӧя гижны да бура лӧсьӧдны текстъяс. Дерт, ставсӧ колӧ вӧчны конструктивнӧя, пинясьтӧг.

Велӧдчысь вын вылӧ лишнӧй надейтчӧм – тайӧ уна туялысьяслӧн сьӧкыдлун. 70-ӧд воясын Андрей Николаевич Колмогоров реформируйтӧма математика велӧдан уджтас (программа). Ставыс лоис тӧдчымӧн абстрактнӧйджык. Дерт, Колмогоров – нималана математик, сылӧн могыс вӧлі бур... но челядьлы лои сьӧкыдджык велӧдчыны. Лев Семёнович Понтрягин гижӧма, учебникъясын пӧ вӧліны дзик гӧгӧрвотӧм абзацъяс (тыдалӧ, небӧгъяссӧ лӧсьӧдӧмаӧсь омӧль кужанлуна йӧз). Сэсся уджтассӧ бара вежӧмаӧсь, ме велӧдчигӧн ӧткодь куимпельӧсаяс (равные треугольники) эз нин вӧвны “конгруэнтнӧйясӧн”. Но, шуам, миян кафедраӧн вӧвлӧм веськӧдлысь чайтӧ: мӧвпыс Колмогоровлӧн вӧлі бур, сӧмын олӧмас пӧртӧмыс вӧлі лёк.

Колмогоровлӧн реформа да мӧдара реформа лоисны сӧвет кадӧ, сэки туялысьясӧс да велӧдысьясӧс эз топӧдны. Ӧні став нелючкияс тӧдчымӧн сьӧкыдджык бырӧдны: сьӧм оз сетны, бюрократия, минобр университетъяслы, институтъяслы да школаяслы абу ёрт. Сідзкӧ мыжаӧсь абу туялысьяс, а капиталистъяс чиновникъяскӧд. И буретш капитализм вӧсна бать-мамлы оз тырмы кад челядькӧд сёрнитны, челядьлӧн жеб дзоньвидзалун, велӧдысьясӧс да туялысьясӧс нартитӧны, ставыс ёна мудзӧмаӧсь.

Оз ков дзик пыр гижны комментарийяс! Медводз лыддьӧй текст дзоньнас да сюся, сэсся мӧвпалӧй, кодлы лоас пӧльза гижӧдсьыныд, а кодлы лёктор. Нелючкияс йылысь оз ков гижны рочӧн роч сайтъясын да лист бокъясын.

четверг, 17 мая 2018 г.

Тшӧтш пукта татчӧ...

Медым тайӧ лоас казьтылӧмӧн - кыдзи "экспериментируйті" кос му тӧлысьын. Медводдза версия вӧлі менам, сэсся Сергей Елфимовкӧд да нӧшта ӧти морткӧд (коді оз радейт, кор гижӧны сылысь нимсӧ) дыр редактируйтім, артмис некымын версия, сэсся Ивӧ Ксюш отсаліс бӧрйыны медбур вариант. Пукті результат "Коми енкӧла" котырӧ кыдзи коллективнӧй гижӧд, но медым и тані лоас...

Гижлывлі: "Ӧтувтчӧй, котыртчӧй!"
Йӧзыс эз дугдыны пинясьны.
Шулывлі: "Велӧдчӧй, лыддьысьӧй!"
Сӧмын тай некод эз кывзысьлы.
Йӧз веськодьлунӧ кор тангыся,
Быттьӧ сьӧд йирӧ ме сунгыся:
Вайӧда сэки ме син водзӧ
Век кежлӧ вунӧдӧм гижӧдъяс.


вторник, 15 мая 2018 г.

СЁРНИСИКАСЪЯС ЙЫЛЫСЬ


Содта кыв-мӧд ассянь изьваса баннер йылысь, кӧть ачым и бокӧвӧй морт. Гашкӧ, кӧсйӧмыс авторлӧн вӧлі бур – гижа пӧ пӧль-пӧчлӧн сёрнисикасӧн, медым налы (коді ловъя на) лоас нимкодь. А артмӧма лёктор. Комияс бара ӧта-мӧдыскӧд пинясьӧмаӧсь-зыксьӧмаӧсь, а коми кыв велӧдӧмлы паныд сувтысьяс ёна радӧсь: видзӧдлӧй пӧ, комияс асьныс грамотнӧя гижны оз кужны, а миянӧс велӧдны кӧсйӧны.

Дерт, мортыдлы аслас сёрнисикас вермӧ лоны мусаджык. Но ӧні колӧ дорйыны коми кывтӧ, коми войтыртӧ, коми культуратӧ. Ӧтлаӧн тайӧс кокньыдджык вӧчны. Лӧсьӧдӧма ӧд литература кыв, эмӧсь коми гижысьяс-классикъяс. Онӧ кӧ тӧдӧй кыв стандарт, асьныд сэсся кутанныд норасьны – ой, кутшӧм сьӧкыд лыддьыны Тима Веньӧс (либӧ весиг Нёбдінса Витторӧс), а сэсся и вунӧданныд найӧс. Онӧ кӧ кутӧй гижны литературнӧй кывйӧн, сыктывкарсаяслы либӧ, шуам, кулӧмдінсаяслы лоас сьӧкыдджык тіянӧс лыддьыны, а кодкӧ весиг ёрччыны пондас (гашкӧ, рочӧн, медым коми кыв вӧрӧгъяс тайӧс аддзисны, вӧчисны скриншотъяс да ас котыръясӧ пуктісны).

Изьватас – абу торъя войтыр, абу торъя этнос, кӧть налӧн аслыспӧлӧс культура да ас сёрнисикас. Шуам, поморъяслӧн тшӧтш аслыспӧлӧс войвывса культура, аслыспӧлӧс история (крепостнӧй право налӧн эз вӧв), вӧлі и ас сёрнисикас – “поморьска говоря” (ӧні пӧшти вунӧдӧма). Но найӧ – роч войтырлӧн субэтнос, абу торъя войтыр. И Кардорын некод оз гиж баннеръяс помор сёрнисикасӧн (гижисны кӧ – вӧлі зэв ёсь вензьӧм да ме тӧдмалі та йылысь). А “поморьска говоряыс” тшӧтш кодлыкӧ муса. Мыйла нӧ изьватаслы колӧ торйӧдчыны?

Позьӧ, дерт, корсюрӧ пуктавны текстъясӧ сёрнисикаса кывъяс, но оз ков тайӧс вӧчны вывті тшӧкыда (медым не дӧзмӧдны лыддьысьысьӧс), да пыр колӧ висьтавны – кытысь босьтӧма тайӧ кывйыс да кыдзи сійӧс гӧгӧрвоны.

Нӧшта со мый колӧ босьтны тӧд вылӧ. Гижӧ кӧ кодкӧ оз литература кывйӧн, а сёрнисикасӧн, либӧ кӧнкӧ дзугсьӧ, либӧ прӧста мыйкӧ гӧгӧрвотӧм, оз ков гижны роч комментарийяс роч сайтъясын, оз ков норасьны роч газетъясӧ. Кодлы таысь пӧльза? Коми кыв велӧдӧмлы паныд сувтысьяслы. Эм кӧ проблема – гижӧй комиӧн коми сайтъясӧ, коми контактса котыръясӧ (шуам, “Сёрни-басни” котырас позьӧ выльтор вӧзйыны), комментарийяс бара жӧ гижӧй комиӧн да вежавидзана.

Энӧ зыксьӧй, велӧдӧй литературнӧй коми кыв, унджык лыддьысьӧй да гижӧй комиӧн. Онӧ кӧ гӧгӧрвоӧй кутшӧмкӧ кывсӧ – видзӧдлӧй кывкудйӧ, сэсся позьӧ видзӧдлыны коми кыв корпусӧ (сэтысь позьӧ тӧдмавны, кӧні тайӧ кывйӧн вӧдитчӧмаӧсь). Абу кӧ – юалӧй.

суббота, 12 мая 2018 г.

Помала экспериментируйтны...

...татшӧм гижӧднас. (Водзӧ кута лӧсьӧдны сӧмын очеркъяс, казьтылӧмъяс да с.в.)

Топавны эськӧ чутӧ -
Сетны ставыслы югӧрӧс. 
Разавны ылдӧс пасьтаыс - 
Сетны ставыслы шоныдӧс...

Вежтӧг коли ме ӧбликӧс -
Тӧдӧмлун сеті йӧзыслы.





понедельник, 7 мая 2018 г.

РЕГ-ТАЙМ

Ӧкмысдасӧд во.
Айӧй менам ворсӧ
Джоплинлысь рег-тайм.
Оръясян шы-лад.
Торкан-кисьтан кад.

PS Rag-time англичан кывйӧн - орӧм, киссьӧм кад (ог тӧд, кутшӧм синоним бӧрйыны). Скотт Джоплин - рег-тайм гижысь.


воскресенье, 15 апреля 2018 г.

ПӦШТИ ЗБЫЛЬТОР


Мӧскуаса ӧти бур вузын профессоръяс-доцентъяс чукӧртчисны кафедра заседанньӧ вылӧ. Веськӧдлысьыс висьталіс выль индӧдъяс йылысь.
— Топӧдӧны тай миянӧс!
— Да, коммерциализация быдлаын. Регыд вузъяс лоасны вузасянінъясӧн!
— Бюрократизация тшӧтш. Менам аспирант дасьтысьӧ диссертация дорйӧм кежлӧ. Лыддис ВАК* индӧдъяссӧ дай весиг вак-вакӧн сераліс, пӧшти истерика сылӧн вӧлі.
— Ветлі ме Америкаӧ 90-ӧд воясын — сэні тадзи жӧ, сӧмын барыш йылысь и мӧвпалӧ натшальствоыс.
— Сӧветскӧй кадӧ бурджык тай вӧлі...



Сёрнитыштісны, сэсся Выль во заводитісны пасйыны. Ӧтитор-мӧдтор йылысь баитісны, философствуйтны босьтчисны. Со ӧти профессор и шуис:
— Мыйла марксизм паськаліс став мир пасьта? Ме чайта, помкаыс татшӧм: сійӧ — медся примитивнӧй теория.
— Гашкӧ, помкаыс мӧдторйын? Йӧз тшыгъялӧмаӧсь, кач сёйӧмаӧсь, дас кык час суткинас заводъясын уджалӧмаӧсь, — вочавидзис том ассистент.
— Но, тэ материалист. А колӧ ӧд и лов могмӧдӧм йылысь мӧвпавны! — чӧскыд торт сёйигӧн вомаліс сійӧс мӧд профессор.

*ВАК — высшая аттестационная комиссия

среда, 4 апреля 2018 г.

КӦНӦСЬ ТІ, ВЫЛЬ НЁБДІНСА ВИТТОРЪЯС?


Эмӧсь-ӧ миян йӧз, кодъяс эськӧ гижисны ёсь публицистика да велӧдісны-югдӧдісны комиясӧс? Тойлӧны тай горш озыръяс ставнымӧс важ мира йирӧ, а ми пырам сэтчӧ думайттӧг, да некод, буракӧ, оз и ӧлӧд... Тыдалӧ, аслым ковмас шуны кыв-мӧд та йылысь, кӧть и омӧлика на кужа гижны. А сэсся кута виччысьны, кор локтас выль Нёбдінса Виттор да югдӧдас коми войтырӧс мича да сӧдз коми кывйӧн.

1. Эмӧсь, вӧлӧмкӧ, коми йӧз, кодъяс ас стен вылӧ пуктӧны гижӧдъяс “вежа” Микулай сар либӧ “шуда” революцияводзса кад йылысь. Коми мортлы ошкыны саръясӧс некыдз оз позь. Сардырся кадӧ комияслӧн вӧлі ичӧт позянлун велӧдчыны, кӧть найӧ ёна зільӧмаӧсь да пыдди пуктӧмаӧсь велӧдчӧм йӧзӧс. Политика сэки вӧлі дзик русификаторскӧй, челядьӧс велӧдӧмаӧсь гӧгӧрвотӧм роч кывйӧн. Та вӧсна озырджык да велӧдчӧмаджык коми йӧз кызвыныс эз пыдди пуктыны коми кыв, революция бӧрын сувтӧмаӧсь коми газетъяслы да коми школаяслы паныд. Сы йылысь позьӧ лыддьыны, шуам, Сандрик Миколлӧн гижӧдъясысь.

2. Ӧти коми мортлӧн листбокысь аддзи репоститӧм гижӧд: Генри Форд шуӧма, Октябрса революциясӧ пӧ вӧчӧмаӧсь, медым еврей капиталистъяс вежисны роч капиталистъясӧс, да тадзи пӧ и лои: ӧні ӧд эмӧсь еврейяс-олигархъяс. Мый ме шуа? Ӧти-кӧ, коммунистъяс сулалӧмаӧсь капитализмлы паныд, нуӧдӧмаӧсь национализация. Мыйла сэсся лоӧма контрреволюция – тайӧ торъя сёрни. Мӧд-кӧ, ӧнія озыръяс лыдын абу сӧмын еврейяс, а еврейяс пиас унджыкыс прӧстӧй, а абу озыр йӧз. Коймӧд-кӧ, Генри Фордӧс цитируйтны дзик абу лӧсьыд: сійӧ ачыс вӧлі “олигархӧн”, реакционнӧй видзӧдласа мортӧн, сулалӧма профсоюзъяслы паныд, финансируйтӧма немеч фашистъясӧс.

3. Зэв жаль, но коми йӧз пиын, вӧлӧмкӧ, эмӧсь антисемитъяс, весиг “лёк еврейяс” йылысь видеояс паськӧдӧны. А менам эм уджъёрт биология факультетысь, еврей, сійӧ олӧ сӧмын ас удждон вылӧ (сійӧ научнӧй сотрудник, тайӧ абу ыджыд “чин”). Тӧданныд-ӧ ті, мый сійӧ сулалӧ коми кыв вӧсна, лэдзис менсьым гижӧдъясӧс коми культура йылысь “Социальнӧй компас” сайтын, отсаліс меным нуӧдны пикет Коми представительство дорын?

Колӧ сувтны оз еврейяслы паныд, а капитализмлы паныд. Войтыръяс костын пинясьӧмысь горш да наян йӧз сӧмын озырмасны, а прӧстӧй йӧзлы лоас нӧшта на лёкджык.

Ӧти сайын, колӧ эськӧ комиӧдны бур, прогрессивнӧй видзӧдласа еврей гижысьясӧс: Шолом-Алейхемӧс, Ицхок-Лейбуш Перецӧс, Менделе Мойхер-Сфоримӧс. Тадзи ас чужан кыв пыр коми войтыр вермас тӧдны, кыдзи збыльвылас овлӧмаӧсь прӧстӧй еврейяс революцияводзса кадӧ (кызвыныс – зэв гӧлиника, сьӧмыс тшӧкыда эз тырмы весиг сёян вылӧ).

4. “Энӧ дивитӧй ті менӧ, коми аньяс, бабаяс”... Видзӧдлыны кӧ коми аньлӧн листбок вылӧ – вель тшӧкыда аддзан эзотерика, гороскопъяс, “дивӧяс”... Унатор – весиг абу важ коми культураысь. Важ коми традицияяс йылысь, дерт, колӧ тӧдны, но оз сы вӧсна, медым овны 19-ӧд нэмын моз, а медым бурджыка гӧгӧрвоны история, медым художествоа гижӧдъясын да спектакльясын эз вӧвны дзугсьӧмъяс. Пӧчиньяс ногӧн олӧм оз кыпӧд коми культуратӧ! Босьтны важ олӧмысь позьӧ сӧмын бурторсӧ (шуам, войтырлысь вежӧр), а оз нинӧм абуӧ эскӧм.

Колӧ, медым коми кыв пыр коми йӧз югдӧдісны вежӧрнысӧ, тӧдмалісны история йылысь (уна-ӧ коми морт лыддьӧ важ “Ордым” журнал?), лыддисны коми классикъясӧс, висьталісны ывлавыв тӧдмалӧм да математика йылысь, ставмирса культура йылысь. Со, кодкӧ “репоститӧ” ас листбок вылӧ гижӧд кутшӧмкӧ туналӧм йылысь (абу история либӧ фольклористика боксянь, а кыдз “рецепт”). А позьӧ та пыдди висьталыштны комиӧн, шуам, Моцартлӧн сонатаяс, Ван Гоглӧн серпасъяс йылысь (гуглитны, чайта, ставным кужам). Позьӧ (да колӧ) пуктыны коми гижысьяслысь кывбуръяснысӧ да налӧн прозасьыс цитатаяс. Медым коми кыв лоас ыджыд культуракӧд йитӧдӧн да велӧдӧм паськӧдан “инструментӧн”!

Октябрса революция бӧрын коми прогрессивнӧй интеллигенция вӧчӧма зэв унатор, медым югдӧдны-пальӧдны коми войтырӧс. Нёбдінса Витторӧс да Сандрик Миколӧс лыддигӧн ме аддзи, кутшӧм гырысь удж нуӧдӧмаӧсь тайӧ кадся коми гижысьяс, журналистъяс, велӧдысьяс, туялысьяс... Унаӧс на пиысь сэсся виӧма чакотка, либӧ репрессияяс, либӧ Ыджыд тыш. Вайӧй огӧ кутӧй вины найӧс мӧдысь!

суббота, 3 марта 2018 г.

КӦЗА ПЛЕНЫН (творческӧй кризис да важ мира йир йылысь)


Талун Тима Веньсянь усьӧм югӧрӧн видла югдӧдыштны, артмас кӧ.

Лыдди неважӧнКӧза пленын” баснясӧ. Сэні Тима Вень висьталӧ, кыдзи сылы ӧтчыд лои зэв гажтӧм, ставыс кажитчис рудӧн, лыддьысьны ни, гижны ни, узьны эз вермы; петіс ывлаӧ, ветліс Сыктывкарті, а сэні вӧлі уна кӧза (“Став карсӧ кӧзаяс талун пӧлӧнӧ босьтӧмны”) да пӧшти ньӧти морт. Лыдди да чайті: уна йӧз кӧ тӧдісны баснясӧ, гашкӧ, вӧлі коми кывйын татшӧм зумыд кывтэчас: “ме талун кӧза пленын” “менам талун депресняк”.



Ӧні менам гижан сям “кӧза пленын”. Вель дыр эз вӧв некутшӧм мӧвп мый йылысь гижны “Пасйӧдъяс” блогйӧ? Быд сюжет кажитчис бонзьӧмӧн, гажтӧмӧн, ковтӧмӧн. Ӧти лунӧ ӧдва эг босьтчы гижны “важ мира йирӧ” тойлӧм йылысь: кыдзи кодсюрӧ коми интеллигенция пиысь жалитӧны Романов саръясӧс да мыйла тайӧ лёк. А сэсся чайті: тайӧ интеллигентъясыс ӧд велӧдчӧм йӧз, лыддьӧмаӧсь, дерт, кыдзи коми кывтӧ да коми культуратӧ топӧдӧмаӧсь революцияводзвывса кадӧ да, некутшӧм выльтор ме налы ог висьтав, а бур публицистика бара жӧ менам оз артмы.

Ӧти сайын, “важ мира йирӧ” фразаыс Тима Веньлӧн “Кодарас ми” поэмаысь. Заводитчӧ сійӧ тадзи:

     “Мед
      кӧть и сьӧкыд
      ӧнісӧ овны —
      колям
      ми век
      таладор пӧлас.
      Медым
      кӧть мыйӧн
      ми воксӧ шуасны,
      сынам
      ми пыр
      выльла дор.

(Йӧзӧдӧма поэмаыс вӧлі 1933-ӧд воын, “Ударник” журналын, сэсся 1936-ӧд вося “Олӧм вояс” небӧгын; дерт, 1936-ӧд во бӧрын нӧшта сьӧкыдджык лои овны...) Ме серти, тайӧ зэв веськыд видзӧдлас: Тима Вень и 30-ӧд воясся сьӧкыдлун йылысь шуӧ, и революцияводзвывса кадсӧ бурӧн казьтылӧмысь видзӧ:

     “Некод оз лысьт
      тойыштны миӧс
      важ мира
      йирӧ.
      Мыйла?
      Да сійӧн, —
      мый сьӧлӧмъяс
      йирӧмӧн йирліс
      важ олас мирыс!..

Тайӧ поэма йылысь пасйыштӧмӧн и помала талунъя гижӧдӧс. Унатор ог висьтав “кӧза плен” (творческӧй кризис) вӧсна.



вторник, 16 января 2018 г.

КОМИ КЫВ МЕНАМ ОЛӦМЫН – 5

Шок да шог

Йирым тӧлысь 28-ӧд лунын аддзи зэв лёк выльтор. Сыктывкарса минобразсянь локтіс юӧр, тӧвшӧр тӧлыссянь пӧ коми кыв оз ло быть велӧданторйӧн. Сыысь кындзи лыдди контактысь, кык вежон сайын пӧ муніс сёрни финн-йӧгра лаборатория коланлун йылысь да минобраз горзӧма, коми кыв пӧ некодлы оз ков...

Менам медводдза реакция – шок.

Приказсӧ коми кыв велӧдӧм йылысь йӧзӧдӧмаӧсь гусьӧн, минобразлӧн “традицияяс” серти. Со тадзи жӧ РАН-сӧ реформируйтӧмаӧсь некымын во сайын.

Лои дзик сьӧкыд сьӧлӧм вылын. Медводдза кадӧ весиг эг тӧд, кыдзи отсавны да, чайті ачымӧс дзик ковтӧм мортӧн. Гӧгӧрвои: эмӧсь коми йӧз, кодъясӧс ме войдӧр пыдди пукті да кодъяслы ӧні ог эскы. Тайӧ бара жӧ менӧ дойдіс. Корсюрӧ кажитчис, быттьӧ кавшаси джуджыд кыр вылӧ, а сэсся менӧ тойыштісны да ӧні ме йирӧ уся, а став менам олӧмӧй коми кыв велӧдӧмсянь ӧдйӧ мунӧ син водзын.

Босьтчи редактируйтны Нёбдінса Витторлысь коймӧд томсӧ, но кык вежон чӧж верми лыддьыны сӧмын дас кымын листбок: восьта файл да видзӧда ӧти чутӧ...

***

Ставныдлы колӧ зэв бура гӧгӧрвоны: ӧнія кадӧ, кор Коми муын пӧшти став йӧз гӧльӧсь, кор быдлаын ошкӧны “успешнӧй” озыръясӧс, кор чинушаяс нартитӧны-увтыртӧны велӧдысьясӧс да туялысьясӧс, кор газет-журнал сӧрӧны, колӧ пӧ велӧдны сӧмын тайӧ предметъяс, кодъясӧн кутанныд вӧдитчыны “реальнӧй олӧмын”, кор уджтӧмалӧм вӧсна йӧз ёна полӧны удж вылӧ инасьтӧмысь, кор культуратӧ донъялӧны йӧй да ковтӧм рейтингъяс серти, – “велӧдан мездлун” вермас бырӧдны коми кывтӧ. Тима Веньӧс, Нёбдінса Витторӧс, Илля Васьӧс, Альберт Ванеевӧс да мукӧд гижысьясӧс некод нин сэк оз вермы лыддьыны, вошас коми гижӧдлӧн мичлуныс! Коми мортлы оз ков лоны веськодьӧн: лоас кӧ татшӧмӧн, сійӧ вошас коми культура, а роч, англичан либӧ мукӧд культура оз босьт, ӧд некӧн оз пыдди пуктыны веськодь йӧзӧс.


Водзсасьӧм

Йирым помын пыри коми кыв велӧдысьяскӧд сёрнитӧмӧ. Мӧвпалім, мый керны, велӧдысьяс висьталісны классъяс йывсьыныс. Ӧтиклы велӧдчысьясыс гижӧмаӧсь нин, ми пӧ радейтам коми кыв, шуам ыджыд аттьӧ витӧд класслы выль велӧдчан небӧг лӧсьӧдысьяслы. (Сэсся пеж виж пресса сӧрис, велӧдысьяс пӧ дзебсьӧны челядь сайӧ. А ме тӧда тайӧ велӧдысьсӧ, сійӧ зэв енбиа да веськыд морт.) Мӧд казьтылӧ: ме куті велӧдны школаын некымын во сайын, сэки челядь вӧліны коми кывлы паныд, весиг переменаяс дырйи увтыртісны менӧ, но ме эг сетчы... а сэсся тайӧ жӧ челядьыс вермисны коми кыв конкурсъясын! Коймӧд гижӧ, локтісны пӧ бать-мам ме дінӧ, сёрнитыштісны да гӧгӧрвоисны: коми кыв велӧдны интереснӧ да абу сьӧкыд. Висьтавлісны и омӧль велӧдысьяс йылысь, кодъяс тшӧктӧны сьӧкыд текстъяс комиӧдны, а асьныс оз вермыны: медым пӧ челядь асьныс миянлы комиӧдасны. Дерт, быдлаын эмӧсь бурджык да омӧльджык велӧдысьяс, быд регионын, школаясын да университетъясын. Но мыйла колӧ вӧдитчыны “рыночнӧй” ногъясӧн, пыртны коми кыв велӧдӧмсӧ ас окота серти? Практика петкӧдлӧ: тайӧ сӧмын ёнджыка ставсӧ жугӧдас. Велӧдысьясӧс ӧмӧй татӧг оз нартитны? Оз ӧмӧй позь висьтавны, кутшӧм сикаса гортса удж бурджык сетны, мый оз ков вӧчны, кыдзи вӧдитчыны электроннӧй кывкудъясӧн, коми онлайн небӧгаинӧн, кыдзи велӧдысьяслы кыпӧдны ассьыныс квалификация, кытысь аддзыны выль коми кывъя ресурсъяс, енбиа коми велӧдысьяслысь сайтъяснысӧ? Ӧні та йылысь позьӧ гижны электроннӧй файлӧ да ыстыны школаясӧ ӧтуввез пыр, некутшӧм сьӧм печать вылӧ оз ков. Колӧ сӧмын ставсӧ бура лӧсьӧдны, медым тайӧ быд школаӧдз, быд велӧдысьӧдз воис.

Медводдза лунъясӧ нуӧдӧмаӧсь флэшмоб, кӧні челядь сьылісны коми сьыланкывъяс да лыддисны коми кывбуръяс. Ӧти нывка зэв мичаа висьталіс Геннадий Юшковлысь “Тешкодь сикт” кывбурсӧ – прамӧй актриса! Ме тшӧтш участвуйті, кӧть видео менам бергӧдӧмаӧн артмис, “ачпасӧн” вӧчи да. Лыдди Альберт Ванеевлысь “Сійӧ ӧзтіс поэзия би” кывбурсӧ. Сійӧ сиӧма Федерико Гарсиа Лоркалы, испанскӧй поэтлы, кодӧс фашистъяс виӧмаӧсь 1936-ӧд воын гражданскӧй тыш дырйи:

       “...Став Испаниялысь бур пиӧс,
Медся авъяӧс-сюсьӧс, сійӧс
Пеж фашизм гусьӧн лыйис-виис,
Медым му вылын мичлун эз ов.

Ӧд фашизмлӧн оз чужны поэтъяс,
И оз вермыны лоны поэтъяс —
Гырдӧсь киӧн оз овны поэтъяс
       И оз вузавны сӧстӧм бур ним...”

Гожӧмнас на сьӧлӧм вылӧ воис тайӧ кывбурыс...

Недыр мысти заводитіс коми кыв вӧсна кырымпас чукӧртӧм. Та бӧрын лёк неолибералъяс босьтчисны сӧрны, коми кыв быть велӧдӧм вӧсна пӧ сулалӧны дыш коми велӧдысьяс, кодъяс оз кӧсйыны кыпӧдны ассьыныс квалификация, коми кывлы пӧ нинӧм оз грӧзит, эмӧсь пӧ интереснӧй проектъяс: шуам, “Сёрни-басни” котыр, коми электроннӧй ресурсъяс... Ылӧдлӧны йӧзсӧ тайӧ пеж рыночникъясыс. Ӧти-кӧ, кырымпасъяс чукӧртны заводитісны финн-йӧгра лабораторияса уджалысьяс, кодъяс тайӧ электроннӧй ресурсъяссӧ и лӧсьӧдӧны, а ме, “Сёрни-басни” котырлӧн редактор, ачым коми кыв быть велӧдӧм вӧсна да кырымпасӧс пукті. Мӧд-кӧ, уна сикаса проектъяс, дерт, колӧны, но велӧдан системасӧ жугӧдны оз позь. Коймӧд-кӧ, ме тайӧ кадӧ казялі нин: коми кыв вӧсна косясьӧмын водзмӧстчысьджык велӧдысьяс медся енбиаӧсь, буретш налӧн челядь вермӧны конкурсъясын.


Вежон чӧж кымын гижавлі “Сёрни-басни” котырӧ финн-йӧгра лабораториялӧн ресурсъяс йылысь: коми раскладка, коми онлайн небӧгаин, коми кывкудъяс, коми тӧданін да мукӧдтор йылысь. Гижи мӧскуаса лингвистъяслы коми кыв да лаборатория йывсьыс. Найӧ, вӧлӧмкӧ, тӧдӧны коми кыв корпус йылысь, вӧдитчӧны сійӧн, ёна ошкисны лабораторияса уджалысьясӧс.

Вӧльгым тӧлысь 9-ӧд лунӧ Изьваын нуӧдӧмаӧсь митинг коми кыв вӧсна. Ме тайӧ жӧ кадӧ локті Мӧскуаса Коми Представительство дінӧ да сулалі сэні ӧтка пикетын.

Лун мысти Сыктывкарса коми войтырлӧн конференция корӧма киритны министерстволысь приказ.

Кад кежлӧ мир

Регыд республикаса юралысьяс дугӧдісны минобразлысь приказсӧ. Гожӧмӧдз коми кыв лоас быть велӧданторйӧн.

Лои неуна кокньыдджык. Бӧръяпомыс верми редактируйтны Нёбдінса Витторлысь прозасӧ, небӧгсӧ лыддьыны удиті выль воӧдз. Ӧні лыддя мӧд пӧв. Вӧчи выль слайдъяс “математика комиӧн” группаӧ. Колӧ эськӧ “Велӧдӧм паськӧдан блог” водзӧ нуӧдны, а ме со босьтчи “Пасйӧдъяс” блогйӧ висьтавны коми кыв йылысь...

Колӧ шуны веськыда...”


Коми енкӧлаті шӧйтігмоз ме аддзи ыджыд шуд да ыджыд шог. Ӧтарсянь, нимкодяси коми литератураӧн, тӧдмалі вына коми йӧз йылысь, кодъяс сьӧкыд олӧм вылӧ видзӧдтӧг кыпӧдӧмаӧсь коми культура да лёкторсӧ бырӧдӧмаӧсь. Мӧдарсянь, тӧдмалі, кыдзи мукӧд “комияс” вузалӧны коми кыв; кыдзи горшлун либӧ йӧйлун понда найӧ вермӧны юклыны ӧтувъя коми войтырсӧ некымын торъя “войтыр” вылӧ; кыдзи рӧдня вермӧ мучитны чорыда висьысь мортӧс, коді чукӧртӧ сьӧм ас бурдӧдӧм вылӧ; кыдзи зэв енбиа ныв пырӧма вез маркетингӧ да эновтіс финн-йӧгра лабораторияын уджавны, кутшӧмкӧ наян горш морт сійӧс кыскӧма сэтчӧ да. (А нылыслӧн удж вӧлі эськӧ ёна колана лабораторияыслы, неважӧн ме тайӧс вывті бура гӧгӧрвои.) 


Тайӧ “мӧдарсянь” вӧснаыс менам лов вылын зэв лёк овлывлӧ. Сӧмын ме ог жалит. Да, ме вештыси аслам лӧнь олӧмӧн коми культураӧн тӧдмасьӧм понда. Но падъявтӧг да майшасьтӧг шуа: босьті унджык воштӧм серти.


***

Со и сигӧрта* ме ассьым гижӧдӧс. Бура-ӧ артмӧма – ог тӧд. Но воис кӧ сійӧ сьӧлӧм выланыд, энӧ вунӧдӧй: ме сӧмын усьӧм югӧрӧн югдӧда, тӧлысь моз (тайӧ бара жӧ абу менам мӧвп, ӧти бард сьыланкывйысь босьті). Ог вермы ме унатор сетны коми культуралы, колана велӧдчӧм абу да. Но уна йӧз кӧ кутасны тӧждысьны коми кыв вӧсна ас верманлун сертиыс, коми культура кыпӧдчас. Лыддьӧй коми небӧгъястӧ да челядьнытӧ велӧдӧй лыддьысьны. Медым наысь выль шондіяс петасны да югдӧдасны Коми мутӧ!


* помала