Лёк да бур висьӧмъяс

Тӧрыт Ленинкаӧ ветлі, 1921-ӧд вося "Удж" да "Югыд туй" газетъясла. Асывнас чайті: та йылысь блогӧ мыйкӧ и пасйышта. Сӧмын этша номер сюрис. Некымын коми статья тетрадьӧ гижи, регыд текстуйтны (набирайтны) кута. Тематика унджыкыс "депрессивнӧй": Волга дорын тшыгъялӧм, Комиын самӧкур пуӧм, вуджан висьӧмъяс... Нинӧмла, ме чайта, тайӧс комментируйтны. 

Мӧдтор йылысь висьтала. Метроын Геннадий Юшковлысь небӧгсӧ лыдди. Уна буртор сэтысь позьӧ аддзыны, весиг сӧмын ӧти висьтысь да ӧти тема кузя. "Бура вӧчны колӧмыс миян пӧльяслӧн вӧлӧма аслыспӧлӧс висьӧм кодь. Кытчӧдз сьӧлӧмныс оз бурмы, сэтчӧдз абу и эновтчылӧмаӧсь, мый кӧть оз вӧчны. Татшӧм бур висьӧмнас и висис Конӧ Семӧ..." (Трипан Вась тӧд вылӧ усис: "Керӧма кӧ, мед вӧлі вӧчӧма бура, а не кийывсӧн", — шуӧ сійӧ.) Но медводз Конӧ Семӧ мӧвпавны тшӧктӧ: "Юрыд, Генагей, быдлаӧ колӧ. Вот!" Томджыкъяссӧ чирыштӧ: "Некор ӧд ӧнія йӧзыдлы думыштлынытӧ". А тайӧ нин автор нимсянь шуӧма: "Али ми-воклы, велӧдчӧмаясыдлы, мый асьным вӧчам, ставыс нин бурӧн кажитчӧ?"